പോലീസ് സ്റ്റേഷനിൽ നേരിട്ട് പോകാതെ തന്നെ അജ്മാൻ നിവാസികൾക്ക് പോലീസുമായി മെറ്റാവേർസിൽ സംവദിക്കാൻ അവസരം ഒരുക്കി യുഎഇ. ആളുകളെ വെർച്വൽ ആയി കാണാൻ സാധിക്കുന്നതിനാൽ പോലീസ് സ്റ്റേഷനിൽ എത്തേണ്ടതിന്റെ ആവശ്യം ഇല്ലാതെയായിരിക്കുന്നു.
കമ്മ്യൂണിറ്റിയിൽ ഉൾപ്പെട്ട അംഗങ്ങൾക്കും പോലീസ് ഉദ്യോഗസ്ഥർക്കും വെർച്വൽ റിയാലിറ്റി ഹെഡ്സെറ്റ് ഉപയോഗിച്ച് സ്മാർട്ട് ഫോണുകൾ, ടാബ്ലെറ്റുകൾ, ലാപ്ടോപ്പുകൾ അല്ലെങ്കിൽ ഡെസ്ക്ടോപ്പ് കമ്പ്യൂട്ടറുകൾ എന്നിവയിലൂടെ കണക്റ്റ് ചെയ്തതിന് ശേഷം മെറ്റാവേഴ്സിൽ പരസ്പരം സംവദിക്കാനാകും. സന്ദർശകർക്ക് മെറ്റാവേഴ്സിലെ ഒരു മീറ്റിംഗ് റൂമിലെത്തി ഉദ്യോഗസ്ഥരെ സന്ദർശിക്കാനുള്ള അവസരമുണ്ട്.
യുഎഇയിൽ ആദ്യമായി ഇത്തരത്തിലുള്ള പോലീസ് സേവനം നൽകുക എന്നതാണ് മെറ്റാവേർസ് പദ്ധതിയെന്ന് അജ്മാൻ പോലീസ് ജനറൽ കമാൻഡ് പറഞ്ഞു. അജ്മാനിലെ ഡിജിറ്റൽ രംഗത്തെ വികസന കുതിപ്പ് നടത്തുന്ന ആദ്യ സർക്കാർ സ്ഥാപനമായി അജ്മാൻ പോലീസ് മാറുമെന്നും അദ്ദേഹം കൂട്ടിച്ചേർത്തു.
അജ്മാൻ പോലീസിന്റെ ഉപഭോക്താക്കളുമായുള്ള സഹകരണം
ശക്തിപ്പെടുത്തുകയാണ് ലക്ഷ്യമെന്ന് അൽ നുഐമിയ സമഗ്ര പോലീസ് സ്റ്റേഷനിലെ സേവന വികസന ടീം മേധാവി ലെഫ്റ്റനന്റ് കേണൽ മുഹമ്മദ് ബിൻ അബ്ദുല്ല അബു ഷെഹാബ് പറഞ്ഞു.
