പതിനെട്ട് മീറ്റര്‍ ഉയരമുളള കു‍ഴലിനുളളില്‍ ഒമ്പതിനായിരത്തിലധികം ചെടികളും ഔഷധ സസ്യങ്ങളും മുത്തുച്ചിപ്പി കൂണും. വേൾഡ് എക്സ്പോ 2020ന്‍റെ ഭാഗമായുളള നെതര്‍ലന്റ് പവലിയന്റെ പ്രധാന ആകര്‍ഷണമായിരുന്നു കു‍ഴല്‍ ഫാം കൃഷി. ആയിരക്കണക്കിന് സന്ദർശകരെ ആകർഷിച്ച ഈ ഫാം ഇനി വെറുതേ കിടക്കില്ല. ലോക മേള അവസാനിച്ചതിനെ തുടര്‍ന്ന് പവലിയൻ അടച്ചെങ്കിലും, ദുബായ് നിവാസികൾക്ക് വെത്യസ്തമായ കു‍ഴല്‍ ഫാം സന്ദർശിക്കാനും പ്രാദേശികമായി ഉൽ‌പാദിപ്പിക്കുന്ന കൂൺ ഭക്ഷണത്തില്‍ ഉൾപ്പെടുത്താനും അവസരമൊരുങ്ങുന്നുവെന്നാണ് സൂചന.
പ്രാദേശിക സംരംഭകനും അബുദാബി സോർബോൺ സർവകലാശാലയിലെ അധ്യാപകനും വിദ്യാഭ്യാസ വിചക്ഷണനുമായ ദിമ അൽ സ്രോരി ഡച്ച് പവലിയനിൽ നിന്ന് മുത്തുച്ചിപ്പി മഷ്റൂം ഫാമും സംവിധാനവും സ്വന്തമാക്കിയെന്നാണ് പുതിയ റിപ്പോര്‍ട്ടുകൾ. കു‍ഴല്‍ ഫാം മറ്റൊരിടത്തേക്ക് മാറ്റി സ്ഥാപിച്ച് തുടര്‍ കൃഷിയാണ് ലക്ഷ്യം. വേനൽക്കാലത്ത് കു‍ഴല്‍ കൃഷി ഉല്‍പ്പനങ്ങൾ ഭക്ഷണശാലകളിൽ വിതരണം ചെയ്യാനും വിദ്യാഭ്യാസ ആവശ്യങ്ങൾക്കായി ഉപയോഗിക്കാനുമാണ് തീരുമാനമെന്ന് ഫാം സ്വന്തമാക്കിയ ദിമ അൽ സ്രോരി പറഞ്ഞു.
എക്സ്പോ നടന്ന ആറ് മാസത്തിനിടെ, പവലിയന്റെ ബയോടോപ്പിനുള്ളിലെ വെള്ളം, ഊർജം, ഭക്ഷണം എന്നിവയെ ബന്ധിപ്പിക്കുന്ന വൃത്താകൃതിയിലുള്ള കാലാവസ്ഥാ സംവിധാനം ഉപയോഗിച്ച് ടൺ കണക്കിന് കൂൺ കൃഷിയാണ് നടന്നത്.
വലിയ ടണലിന്‍റെ മുകളിലുള്ള ഒരു ചിമ്മിനി ആഗിരണം ചെയ്യുന്ന വായുവും പവലിയന്റെ മേൽക്കൂരയിലെ സോളാർ പാനലുകൾ ഉപയോഗിച്ച് ഘനീഭവിക്കുന്ന ജലവുമാണ് ചെടുകളുടെ വളര്‍ച്ചയ്ക്ക് നിദാനം. ഡച്ച് കമ്പനിയായ സൺഗ്ലേസിയർ ടെക്‌നോളജീസിന്റെയും ഡിസൈനർ എപി വെർഹെഗന്റെയുമാണ് ഈ ആശയം. പ്രതിദിനം 1,200 ലിറ്റർ വെള്ളം വരെ കൂറ്റന്‍ ടണലിന് ഉത്പാദിപ്പിക്കാൻ ശേഷിയുണ്ട്. ഈ ജലം കോണിന്റെ പുറംഭാഗത്തുള്ള സസ്യങ്ങൾക്ക് ഭക്ഷണം നൽകുന്നതിന് ഉപയോഗിച്ചു. അതേസമയം കൂൺ വളർന്നത് ഭീമാകാരമായ കോണിന്റെ ഇരുണ്ട അകത്തളങ്ങളിലാണ്. ഫലപ്രദമായ കമ്പോസ്റ്റിംഗ് സംവിധാനവും ടണലിനുളളിലുണ്ട്.
ഭക്ഷ്യ സുരക്ഷയ്ക്കും സുസ്ഥിര കൃഷി ഉല്‍പ്പാദനത്തിനും പുതിയ രീതികൾ പരീക്ഷിക്കാന്‍ പ്രചോദനം നല്‍കുന്നതായിരുന്നു പവലിയനില്‍ പ്രദര്‍ശിപ്പിച്ച കൂണ്‍ കൃഷി.
