സുരേഷ് ഗോപിക്കെതിരെ കോഴിക്കോട് സിറ്റി പൊലീസ് കമ്മീഷണർക്ക് പരാതി നല്‍കി മാധ്യമപ്രവര്‍ത്തക. തന്നോട് അപമര്യാദയായി പെരുമാറിയെന്നും അനുവാദമില്ലാതെ തോളിൽ പിടിച്ചുവെന്നും കാണിച്ചാണ് മാധ്യമപ്രവർത്തക സുരേഷ് ഗോപിക്കെതിരെ പരാതി നൽകിയത്.
ഇന്നലെ സുരേഷ് ഗോപി കോഴിക്കോട് വെച്ച് മാധ്യമങ്ങളോട് സംസാരിക്കവെയായിരുന്നു സംഭവം. ചോദ്യം ചോദിച്ച മാധ്യമ പ്രവർത്തകയുടെ തോളിൽ സുരേഷ് ഗോപി കൈവെക്കുകയായിരുന്നു. ഇതിൽ എതിർപ്പ് അറിയിച്ച് കൈ പിടിച്ചുമാറ്റിയപ്പോൾ ആവർത്തിച്ചെന്നുമാണ് മാധ്യമപ്രവർത്തകയുടെ പരാതി. ഇതിൽ സുരേഷ് ഗോപി മാപ്പ് പറയുകയും ചെയ്തിരുന്നു.
സംഭവത്തിൽ പ്രതിഷേധിച്ച് പത്രപ്രവർത്തക യൂണിയൻ രംഗത്തെത്തിയാണ് സുരേഷ് ഗോപി മാപ്പ് പറയണമെന്ന് ആവശ്യപ്പെട്ടത്. ഒരു മകളെപ്പോലെയാണ് കണ്ടതെന്നും മാനസിക ബുദ്ധിമുട്ട് ഉണ്ടാക്കിയിട്ടുണ്ടെങ്കിൽ ക്ഷമ പറയുന്നുവെന്നുമാണ് സുരേഷ് ഗോപി വ്യക്തമാക്കിയത്. ഇതിനിടയിലാണ് മാധ്യമപ്രവർത്തക താരത്തിനെതിരെ പരാതി നൽകിയത്.
