സംസ്ഥാനത്ത് എസ്എസ്എല്‍സി പരീക്ഷാ ഫലം ജൂണ്‍ 10ന് പ്രസിദ്ധീകരിക്കുമെന്ന് പൊതുവിദ്യാഭ്യാസ വകുപ്പ് മന്ത്രി വി ശിവന്‍കുട്ടി അറിയിച്ചു. പ്ലസ് ടു പരീക്ഷാ ഫലവും ജൂണ്‍ 20ന് പ്രസിദ്ധീകരിക്കും. പരീക്ഷാ ഫലം ജൂണ്‍ 15ന് പ്രഖ്യാപിക്കുമെന്ന് മുന്‍പ് അറിയിച്ചിരുന്നെങ്കിലും അത് നേരത്തെ ആക്കുകയായിരുന്നു.
സംസ്ഥാനത്ത് സ്‌കൂൾ പ്രവേശനോത്സവം നാളെയാണ് നടക്കുക. 12,986 സ്‌കൂളുകളിൽ പ്രവേശനോത്സവം നടക്കും. സംസ്ഥാന തല ഉദ്ഘാടനം തിരുവനന്തപുരം കഴക്കൂട്ടം ഗവ. ഹയര്‍ സെക്കന്‍ഡറി സ്‌കൂളിലാണ് ഇക്കുറി നടക്കുക. സ്‌കൂളുകള്‍ തുറക്കാൻ സജ്ജമാണെന്നും വിദ്യാഭ്യാസ മന്ത്രി വി ശിവന്‍കുട്ടി. ഫിറ്റ്‌നസ് സര്‍ട്ടിഫിക്കറ്റ് ഇല്ലാത്ത സ്‌കൂള്‍ കെട്ടിടങ്ങള്‍ക്ക് പ്രവര്‍ത്തനാനുമതി ഇത്തവണ നല്‍കില്ല എന്നും മന്ത്രി കൂട്ടിച്ചേര്‍ത്തു.
