അഴിമതി സംബന്ധമായ വിവരങ്ങൾ അറിയിക്കാൻ പോർട്ടലും ടോൾഫ്രീ നമ്പറും സജ്ജമാക്കുമെന്നും പാലക്കയം കൈക്കൂലി കേസിൽ കുറ്റക്കാരനെ സസ്പെന്റ് ചെയ്തതിൽ നടപടി ഒതുങ്ങില്ലെന്നും റവന്യൂ മന്ത്രി കെ രാജൻ പറഞ്ഞു. തൃശൂരിലെ മുണ്ടൂർ അഞ്ഞൂർ വില്ലേജ് ഓഫീസിൽ നടത്തിയ മിന്നൽ പരിശോധനക്ക് ശേഷമായിരുന്നു മന്ത്രിയുടെ പ്രതികരണം.
കൈക്കൂലി കേസിൽ മറ്റാർക്കെങ്കിലും പങ്കുണ്ടോ എന്നന്വേഷിക്കും. അഴിമതി അന്വേഷണം സമയബന്ധിതമാക്കാൻ നിയമനിർമ്മാണം നടത്തുകയും പൊതുജനങ്ങൾക്ക് അഴിമതി സംബന്ധമായ വിവരങ്ങൾ അറിയിക്കാൻ ജൂൺ പകുതിയോടെ പോർട്ടലും ടോൾ ഫ്രീനമ്പറും സജ്ജമാക്കുമെന്നും മന്ത്രി പറഞ്ഞു. റവന്യൂ വകുപ്പിനെ വട്ടമിട്ട് പറക്കാൻ ഏജന്റുമാരെ ഇനി അനുവദിക്കില്ല. പങ്കാളികളാകുന്ന ഉദ്യോഗസ്ഥർക്കെതിരെ കടുത്ത നടപടി ആലോചിക്കും. മന്ത്രി കൂട്ടിച്ചേർത്തു.
അഴിമതി കണ്ടെത്താൻ പരിശോധനകൾ ശക്തമാക്കുകയാണ്. 156 വില്ലേജുകളിൽ ഇതിനോടകം പരിശോധന നടത്തി. 14 ജില്ലാ കളക്ടർമാരും പരിശോധനകളിൽ പങ്കാളികളായി. ജനങ്ങളെ കൂടെക്കൂട്ടി അഴിമതിക്കെതിരായ കുരിശുസമരമാണ് ലക്ഷ്യമിടുന്നതെന്നും 5-ന് മുഴുവൻ സർവീസ് സംഘടനകളുടെയും യോഗം വിളിക്കുന്നുണ്ടെന്നും മന്ത്രി പറഞ്ഞു.
.
