നടിയെ ആക്രമിച്ച കേസ് അട്ടിമറിക്കാന്‍ ശ്രമം നടക്കുന്നുവെന്ന ആരോപണവുമായി അതിജീവിത സമര്‍പ്പിച്ച ഹര്‍ജിയില്‍ സര്‍ക്കാരിനോട് ഹൈക്കോടതി വിശദീകരണം തേടി. വെള്ളിയാഴ്ചയ്ക്ക് മുന്‍പായി വിശദീകരണം നല്‍കാനും കോടതി നിര്‍ദേശം നൽകി. കേസിൽ തുടരന്വേഷണത്തിന് ഇനിയും സമയം നീട്ടി നല്‍കാനാകില്ലെന്ന നിലപാടും ഹൈക്കോടതി വ്യക്തമാക്കി.
അതിജീവിതയുടേത് അനാവശ്യമായ പേടിയാണെന്നും ഹര്‍ജി പിന്‍വലിക്കണമെന്നുമാണ് സര്‍ക്കാരിന്റെ വാദം. വേണ്ടിവന്നാൽ വിചാരണക്കോടതിയില്‍ നിന്ന് റിപ്പോര്‍ട്ട് ആവശ്യപ്പെടുമെന്നും കോടതി അറിയിച്ചു. തുടരന്വേഷണത്തിന് സമയം നിശ്ചയിച്ചത് വേറെ ബെഞ്ചാണെന്ന് വിശദീകരിച്ചായിരുന്നു കോടതിയുടെ നിലപാട് വ്യക്തമാക്കൽ. ഹൈക്കോടതി വെള്ളിയാഴ്ച വീണ്ടും കേസ് പരിഗണിക്കും. ഹര്‍ജി പരിഗണിച്ചത് ജസ്റ്റിസ് സിയാദ് റഹ്മാന്റെ ബെഞ്ചാണ്.
നടന്‍ ദിലീപിന് സർക്കാരിലെ അംഗങ്ങളുമായി അവിശുദ്ധ കൂട്ടുകെട്ടുണ്ട് എന്നുൾപ്പടെ ആരോപിച്ചാണ് അതിജീവിതയുടെ പരാതി. രാഷ്ട്രീയ സമ്മര്‍ദത്തിന്റെ പേരില്‍ കേസ് ആട്ടിമറിക്കാൻ ആണ് അന്വേഷണ സംഘം ശ്രമിക്കുന്നതെന്നും നടി പറയുന്നു.
