എറണാകുളം തൃക്കാക്കര ഭാരതമാതാ കോളേജിന് സമീപത്തെ ഹോട്ടലിൽ വിചിത്ര വാദവുമായി യുവാക്കൾ പ്രശ്നം സൃഷ്ടിച്ചു. ഓട്ടോയിലെത്തിയ ഇവർ ഹോട്ടൽ ജീവനക്കാരെ മുൾമുനയിൽ നിർത്തി ബഹളം വെക്കുകയും മേശയും കസേരയും എടുത്തെറിയുകയും ചെയ്തു.
സംഭവം ചോദ്യം ചെയ്ത് മറ്റുള്ളവർ രംഗത്തെത്തിയതോടെ ‘കൂട്ടത്തല്ലായി’ മാറി. ഇന്നലെ വൈകീട്ട് മൂന്നരയോടെ തുതിയൂർ സ്വദേശികളായ മൂന്നു യുവാക്കൾ കുഴിമന്തി ഓർഡർ ചെയ്തു ടേബിളിൽ കാത്തിരിക്കവെയാണ് പ്രശ്നക്കാർ എത്തിയത്.
ഇവരുടെ വരവ് ടേബിളിലിരുന്ന ഒരു യുവാവ് നോക്കിയതിന് സംഘത്തിലുണ്ടായിരുന്ന ഒരാൾ എന്താ നോക്കി പേടിപ്പിക്കുന്നത് എന്ന ചോദ്യവുമായി കൈചുരുട്ടി ഇവരുടെ അടുത്തേക്ക് പാഞ്ഞെത്തുകയായിരുന്നു. പിന്നാലെ കൂടെയുണ്ടായിരുന്നവരും ബഹളമുണ്ടാക്കിയപ്പോൾ ഒന്നുമില്ല എന്ന് പറഞ്ഞ് ഭക്ഷണം കഴിക്കാനെത്തിയ യുവാക്കൾ ഒഴിഞ്ഞുമാറാൻ നോക്കിയെങ്കിലും രംഗം വഷളായി. മേശയും കസേരയും വലിച്ചെറിഞ്ഞ് ഭീകരാന്തരീക്ഷം സൃഷ്ടിച്ചെന്ന്
ഹോട്ടലിലുണ്ടായിരുന്ന ദൃക്സാക്ഷികൾ പറഞ്ഞു. ഇതിനെ ചോദ്യം ചെയ്തതോടെ ഇരുകൂട്ടരും തമ്മിൽ സംഘട്ടനത്തിന്റെ വക്കിലെത്തുകയായിരുന്നു.
