ശ്രീറാം വെങ്കിട്ടരാമനെ ആലപ്പുഴ ജില്ലാ കളക്ടറായി നിയമിച്ചതിനെ എതിർത്ത് കോൺഗ്രസ് രംഗത്ത്. ശ്രീറാം വെങ്കിട്ടരാമന്റെ നിയമനത്തിനെതിരെ എ.ഐ.സി.സി ജനറൽ സെക്രട്ടറി കെ സി വേണുഗോപാലും കോൺഗ്രസ് നേതാവ് എ എ ഷുക്കൂറും പ്രതികരിച്ചു. ശ്രീറാം വെങ്കിട്ടരാമന്റെ നിയമനം ദൗർഭാഗ്യകരമായ സംഭവമാണെന്ന് കെ സി വേണുഗോപാൽ മാധ്യമങ്ങളോട് പറഞ്ഞു. ശ്രീറാം വെങ്കിട്ടരാമൻ കളങ്കിതനായ വ്യക്തിയാണെന്നും ആലപ്പുഴയിലെ നിയമനം റദ്ദാക്കണമെന്നുമാണ് എ എ ഷുക്കൂറിന്റെ ആവശ്യം.
മാധ്യമപ്രവർത്തകൻ കെ എം ബഷീറിന്റെ മരണത്തിനിടയാക്കിയ ആളാണ് ശ്രീറാമെന്നും കൊലപാതകം പോലെയുള്ള ദാരുണമായ മരണമായിരുന്നു അതെന്നുമാണ് എതിർപ്പ് ഉയരുന്നത്. അത്തരത്തിൽ കളങ്കിതനായ വ്യക്തിയായതിനാൽ ആലപ്പുഴയിലെ അദ്ദേഹത്തിന്റെ നിയമനം റദ്ദാക്കണമെന്നും നിയമനത്തിന് പിന്നിൽ മറ്റു ചില താത്പര്യങ്ങളുണ്ടെന്നും അത് നടപ്പാക്കാൻ അനുവദിക്കില്ലെന്നും എ എ ഷുക്കൂർ പറഞ്ഞു. കുറ്റാരോപിതനായ ഒരു വ്യക്തിക്ക് ജില്ലയുടെ പൂർണ അധികാരം നൽകിയതിന്റെ കാരണം മനസിലാകുന്നില്ലെന്ന് കെ സി വേണുഗോപാൽ കൂട്ടിച്ചേർത്തു.
സംസ്ഥാനത്ത് ഐഎഎസ് തലപ്പത്ത് അഴിച്ചുപണി നടത്തിയിരുന്നു. ശ്രീറാം വെങ്കിട്ടരാമനെ ആലപ്പുഴ ജില്ലാ കളക്ടറായി നിയമിച്ചതോടെ എറണാകുളം ജില്ലയുടെ പുതിയ കളക്ടറായി രേണു രാജിനെ സ്ഥലം മാറ്റുകയാണ് ഉണ്ടായത്. തിരുവനന്തപുരത്ത് ജെറോമിക് ജോർജ്ജ് ചുമതല ഏറ്റെടുക്കും. കെഎസ്ഐഡിസി മാനേജിങ് ഡയറക്ടർ രാജമാണിക്യത്തെ റൂറൽ ഡെവലപ്മന്റ് കമ്മീഷണറാക്കുകയും ജാഫർ മാലികിനെ പിആർഡി ഡയറക്ടറാക്കുകയും ചെയ്തു. തിരുവനന്തപുരം കളക്ടറായിരുന്ന നവജ്യോത് ഖോസ ആരോഗ്യ വകുപ്പ് ജോയിന്റ് സെക്രട്ടറിയാകുന്നതോടെ മെഡിക്കൽ സർവ്വീസസ് കോർപറേഷൻ എംഡിയുടെ ചുമതലയും നവജ്യോത് ഖോസെക്കാണ്. കെഎസ്ഐഡിസി മാനേജിങ് ഡയറക്ടറായി ഹരികിഷോറിനെ നിയമിക്കാനും സർക്കാർ തീരുമാനിച്ചിരുന്നു.
