തന്റെ വീട്ടിൽ ഒരു കൂട്ടം ആളുകൾ അതിക്രമിച്ച് കയറാൻ ശ്രമിച്ചുവെന്ന് വെളിപ്പെടുത്തി നടൻ ബാല. ഒരു യുവാവും യുവതിയും കൈക്കുഞ്ഞുമാണ് വീട്ടിൽ എത്തിയതെന്നും വീടിന്റെ പ്രവേശന കവാടത്തിൽ ഉറപ്പിച്ചിട്ടുള്ള നെറ്റ് ഡോർ തുറന്നതിന് ശേഷം പ്രധാന ഡോർ തുറക്കാൻ ശ്രമിച്ചെന്നുമാണ് താരം പറയുന്നത്. സാമൂഹ്യമാധ്യമത്തിൽ പങ്കുവെച്ച വീഡിയോയിൽ സിസിടിവി ക്യാമറയിൽ പതിഞ്ഞ ദൃശ്യങ്ങൾ ഉൾപ്പെടെ താരം പുറത്തുവിട്ടിട്ടുണ്ട്.
പുലർച്ചെ നാല് മണിയോടെ തൻ്റെ വീടിന് പുറത്തുനടന്ന അസാധാരണ സംഭവങ്ങളുടെ വീഡിയോയാണ് ബാല പങ്കുവെച്ചത്. വീടിന്റെ പ്രവേശന കവാടത്തിൽ ഉറപ്പിച്ചിട്ടുള്ള നെറ്റ് ഡോർ തുറക്കുന്നതും കാണാം. എന്നാൽ ഇവർ മാത്രമല്ല, വേറെയും ആളുകൾ വീടിന് പുറത്ത് ആ നേരത്ത് ഉണ്ടായിരുന്നു എന്നാണ് ബാല ആരോപിക്കുന്നത്. കോളിങ് ബെൽ അടിക്കുകയും, വാതിൽ തട്ടി തുറക്കാനും ശ്രമം നടന്നുവെന്നും ബാല പറയുന്നു.
ആരും ഈ നേരത്ത് വന്ന് വാതിൽ തുറക്കാൻ ശ്രമിക്കില്ലെന്നും ഇതൊരു കെണിയാണെന്നും തന്നെ കുടുക്കാനുള്ള ശ്രമം എന്ന നിലയിലുമാണ് ബാല വീഡിയോയിൽ സംസാരിക്കുന്നത്. ജീവിതത്തിൽ ആദ്യമായാണ് ഇത്തരം കാര്യങ്ങൾ നേരിടുന്നത് എന്നും ഇതിന്റെ സത്യാവസ്ഥയെക്കുറിച്ച് അന്വേഷിക്കുമെന്നും താരം പറഞ്ഞു.
