കേരളത്തിന് ഓണസമ്മാനമായി രണ്ടാമത്തെ വന്ദേഭാരത് ട്രെയിൻ ലഭിക്കും. പുതിയ ട്രെയിൻ വടക്കൻ കേരളത്തിലൂടെ സർവീസ് നടത്തുമെന്നാണ് സൂചന. ഡിസൈൻ മാറ്റം വരുത്തിയ വന്ദേഭാരതിന്റെ റേക്ക് ദക്ഷിണ റെയിൽവേയ്ക്ക് അനുവദിച്ചു.
എറണാകുളം- മംഗലാപുരം, തിരുവനന്തപുരം- മംഗലാപുരം, മംഗലാപുരം- കോയമ്ബത്തൂർ റൂട്ടുകളാണ് പരിഗണനയിലുള്ളതെന്നാണ് റിപ്പോർട്ട്.എട്ടു കോച്ചുകളുള്ള ട്രെയിൻ (റേക്ക് വെർഷൻ-2) ഇന്ന് രാത്രിയോടെ ചെന്നൈ ഇന്റഗ്രൽ കോച്ച്‌ ഫാക്ടറിയിൽ നിന്നും പുറപ്പെടും. മംഗലാപുരത്തേക്കാണ് ട്രെയിൻ പുറപ്പെടുക.
അതേ സമയം ഔദ്യോഗികമായ അറിയിപ്പ് ഇക്കാര്യത്തിൽ ലഭ്യമാകേണ്ടതുണ്ട്. ഏറ്റവും പ്രധാനപ്പെട്ട കാര്യം ഡിസൈൻ മാറ്റം വരുത്തിയ ആദ്യ റേക്ക് തന്നെ കേരളത്തിന് അനുവദിക്കുന്നു എന്നുള്ളതാണ്. ഓറഞ്ച് നിറത്തിലേക്ക് മാറിയതിന് ശേഷമുള്ള ആദ്യ റേക്ക് തന്നെ ഓണസമ്മാനമായി കേരളത്തിന് ലഭിക്കുന്നു എന്നതാണ് ശ്രദ്ധേയം. ഏപ്രിൽ 25 നാണ് ആദ്യ വന്ദേഭാരത് എക്‌സ്പ്രസ് പ്രധാനമന്ത്രി നരേന്ദ്രമോദി കേരളത്തിൽ ഉദ്ഘാടനം ചെയ്തത്. നിലവിൽ കാസർകോട്- തിരുവനന്തപുരം റൂട്ടിൽ ഈ വന്ദേഭാരത് സർവീസ് നടത്തിവരികയാണ്.
