ഐക്യകേരളത്തിന് ഇന്ന് 67ആം ജൻമദിനം.ഏഴുദിവസം നീണ്ടുനിൽക്കുന്ന കേരളീയം ഉൾപ്പെടെ വിപുലമായ പരിപാടികളാണ് സംസ്ഥാനത്ത് നടക്കുന്നത്.സ്വാതന്ത്ര്യാനന്തര ഇന്ത്യയിൽ ഐക്യകേരളത്തിനായി നടന്ന നിരവധി പ്രക്ഷോഭങ്ങളുടെ ഭാഗമായാണ് 1956 നവംബർ 1ന് പുതുകേരളം പിറവിഎടുക്കുന്നത്.
1956ൽ നടന്ന സംസ്ഥാന പുനഃസംഘടന നിയമമാണ് രാജ്യത്ത് പല സംസ്ഥാന രൂപീകരണങ്ങൾക്കും വിഭജനത്തിനു ആധാരമായി മാറിയത്. ഭാഷാടിസ്ഥാനത്തിൽ സംസ്ഥാനങ്ങളെ പുനർസംഘടിപ്പിക്കാനുള്ള ഇന്ത്യ സർക്കാറിൻ്റെ തീരുമാനം അനുസരിച്ച് പഴയ തിരുവിതാംകൂർ, കൊച്ചിഭരണ പ്രദേശങ്ങളും മദ്രാസ്‌ പ്രസിഡൻസിയുടെ മലബാർ ഭാഗവും കൂട്ടിച്ചേർത്താണ് ഐക്യകേരളം പ്രഖ്യാപിച്ചത്. ഇതിൻ്റെ അടിസ്ഥാനത്തിൽ നവംബർ ഒന്ന് കേരളപ്പിറവി ദിനമായും ആഘോഷിക്കപ്പെടുന്നു.
സാമൂഹ്യ രാഷ്ട്രീയ പുരോഗമന പ്രസ്ഥാനങ്ങളുടേയും നേതാക്കളുടേയും നിരന്തര ആവശ്യമായിരുന്നു കേരളം എന്നത്. 1921-ൽ ഇന്ത്യൻ നാഷണൽ കോൺഗ്രസ് തിരുവിതാംകൂർ, കൊച്ചി, മലബാർ മേഖലകൾക്ക് പകരം ഇവമൂന്നും കൂട്ടിയോജിപ്പിച്ച് കേരള പ്രദേശ് കോൺഗ്രസ് കമ്മിറ്റി (കെപിസിസി) എന്ന് പുനർനാമകരണം ചെയ്തതും ഐക്യകേരള രൂപീകരണത്തില്‍ നിർണ്ണായകമായെന്നാണ് ചരിത്രം. ഐക്യകേരളത്തിനായി കമ്മ്യൂണിസ്റ്റ് പാർട്ടി നേതാക്കളും വലിയ പങ്കുവഹിച്ചിട്ടുണ്ട്. കേരളം മലയാളിയുടെ മാതൃഭൂമി എന്നപേരില്‍ ഇഎംഎസ് രചിച്ച ഗ്രന്ധവും ശ്രദ്ധേയമാണ്. 1935 ല്‍ കൊച്ചി, മലബാർ പ്രവിശ്യകളിൽ ഉയർന്ന് വന്ന ട്രേഡ് യൂണിയനുകളുടെ അഖില കേരള തൊഴിലാളി സമ്മേളനം കോഴിക്കോട് വെച്ച് നടത്തിയത് പി കൃഷ്ണപ്പിള്ളയുടെ നേതൃത്വത്തിലായിരുന്നു. വൈക്കം സത്യാഗ്രഹം, ഗുരുവായൂര്‍ സത്യാഗ്രഹം തുടങ്ങി കേരളം കണ്ട വലിയപ്രക്ഷോഭങ്ങളിൽ കേരളത്തിലെ വിവിധ ഭാഗങ്ങളില്‍നിന്നുള്ള ജനങ്ങള്‍ പങ്കെടുത്തത് സംസ്ഥാനത്തിൻ്റെ രാഷ്ട്രീയഭൂപടം വ്യക്തമാക്കുന്നതായി.
എന്നാൽ സ്വാതന്ത്ര്യത്തിന് ശേഷമാണ് ഐക്യകേരളത്തിനായുളള നീക്കങ്ങള്‍ ശക്തിപ്പെട്ടത്. പുനസംഘടനാ നീക്കങ്ങളുടെ കാലത്ത് കേരളത്തിനായും ശുപാർശയുണ്ടായി. കേരളം രൂപീകൃതമാകുമ്പോൾ രാജ്യത്ത് നിലവിലുണ്ടായിരുന്ന 14 സംസ്ഥാനങ്ങളിൽ ഏറ്റവും ചെറിയ സംസ്ഥാനമായിരുന്നു കേരളം. വെറും 5 ജില്ലകൾ ചേർന്നതായിരുന്നു കേരളം. ഗവർണർ ഭരണത്തിന് ശേഷം 1957ൽ ആദ്യ പൊതുതിരഞ്ഞെടുപ്പ്‌ ഉണ്ടാകുകയും ഇ എം ശങ്കരൻ നമ്പൂതിരിപ്പാട്‌ മുഖ്യമന്ത്രിയായുള്ള സർക്കാർ അധികാരത്തിൽ വരികയും ചെയ്തതോടെ കേരളത്തിൻ്റെ ഭരണചക്രവും ഉരുണ്ടുതുടങ്ങി.
