സി.പി.ഐ സംസ്ഥാന സെക്രട്ടറി കാനം രാജേന്ദ്രൻ്റെ സംസ്കാരം ഞായറാഴ്ച രാവിലെ നടക്കും. ഇപ്പോൾ കൊച്ചി അമൃത ആശുപത്രിയിലുള്ള ഭൗതിക ശരീരം നാളെ രാവിലെ ഏഴ് മണിയോടെ ഹെലികോപ്റ്ററിൽ തിരുവനന്തപുരത്തെത്തിക്കും. അതിന് ശേഷം മൃതദേഹം തിരുവനന്തപുരത്തെ ഇടപഴഞ്ഞിയിലുള്ള വീട്ടിലെത്തിക്കും.
വീട്ടിൽ അൽപനേരം പൊതുദർശനത്തിന് വെച്ച ശേഷം രാവിലെ പത്ത് മണിയോടെ തിരുവനന്തപുരത്തെ പി.എസ് സ്‌മാരകത്തിൽ പൊതുദർശനത്തിന് വെയ്ക്കും. സംസ്ഥാന ഓഫീസിന്റെ പുനർനിർമ്മാണം നടക്കുന്നതിനാലാണ് പി.എസ് സ്‌മാരകത്തിൽ പൊതുദർശനം നടത്തുന്നത്. ഡി രാജയുൾപ്പെടെയുള്ള ദേശീയ നേതാക്കൾ അന്ത്യോപചാരമർപ്പിക്കാൻ ഇവിടെയെത്തും. ഉച്ചക്ക് രണ്ട് മണി വരെ ഇവിടെ പോതുദർശനം തുടരും.
ഉച്ചക്ക് രണ്ട് മണിയോടെ ഭൗതിക ശരീരം റോഡ് മാർഗം കാനം രാജേന്ദ്രന്റെ നാടായ കോട്ടയം വാഴൂരിലേക്ക് കൊണ്ടുപോകും. പിന്നീട് അവിടെ പൊതുദർശനത്തിന് വെയ്ക്കും. തുടർന്ന് ഞായറാഴ്ച രാവിലെ 11 മണിയോടെ ഔദ്യോഗിക ബഹുമതികളോടെ ശവസംസ്കാര ചടങ്ങുകൾ നടത്തും.
