യൂട്യൂബിലെ ടോപ് മ്യൂസിക് വീഡിയോ ലിസ്റ്റിൽ ഇടം പിടിച്ചതിനു പിന്നാലെ പ്രിത്വിരാജ് നായകനായ ഷാജി കൈലാസ് ചിത്രം ‘കടുവയിലെ പാലാപ്പള്ളി എന്ന ഗാനം 1കോടി വ്യൂസ് നേടി ജനഹൃദയങ്ങളിലേക്കെത്തുമ്പോൾ മലപ്പുറത്തെ സോൾ ഓഫ് ഫോകിനും അഭിമാന നിമിഷം.
തനത് നാടൻപാട്ടുകൾ സാംസ്‌കാരിക വേദികളിലും കലാലയങ്ങളിലുമായി അവതരിപ്പിച്ചു പോരുന്ന മലപ്പുറത്തെ ‘സോൾ ഓഫ് ഫോക് ‘ എന്ന മ്യൂസിക് ബാൻഡിന്റെ അമരക്കാരനായ അതുൽ നറുകരയും സംഘവുമാണ് ഈ ഗാനം ആലപിച്ചിരിക്കുന്നത്. സന്തോഷ്‌ വർമയും ശ്രീഹരി തറയിലും ചേർന്ന് രചന നിർവഹിച്ചിരിക്കുന്ന ഗാനത്തിന് ജേക്സ് ബിജോയ് ആണ് സംഗീത സംവിധാനം. കോഴിക്കോട് വടകരയിലെ നാണു പാട്ടുപുരയെന്ന നാടൻപാട്ട് കലാകാരൻ കണ്ടെത്തിയ ‘ആവോ ദാമാനോ ‘ എന്ന തനത് നാടൻപാട്ടിന്റെ വരികൾ സിനിമയ്ക്കുവേണ്ടി മാറ്റിയെഴുതുകയായിരുന്നു.
സ്കൂളുകളിലും കോളേജുകളിലുമായി ശില്പശാലകൾ നടത്തി തുടങ്ങിയ അതുൽ നറുകര മലപ്പുറത്തെ 15 ഓളം വരുന്ന ചെറുപ്പക്കാരായ നാടൻപാട്ട് കലാകാരന്മാരെ ഒരു കുടക്കീഴിൽ ഒന്നിപ്പിച്ച് 2 വർഷം മുൻപ് ആണ് സോൾ ഓഫ് ഫോക് എന്ന മ്യൂസിക് ബാൻഡിന് രൂപം നൽകിയത്. അതേ പേരിലുള്ള യൂട്യൂബ് ചാനലിലൂടെ തനത് നാടൻപാട്ടുകൾ ലോകത്തിന് പരിചയപ്പെടുത്തുകയും ചെയ്തു. അതുലിന്റെ ‘ഇതിലുമേറെ ‘ എന്ന മ്യൂസിക് വിഡിയോ ജനശ്രദ്ധയാകർഷിച്ചിരുന്നു.ക്ലബ്‌ ഹൌസ് എന്ന ആപ്പിലൂടെ അതുലിന്റെ പാട്ടുകൾ പ്രശസ്ത സംവിധായകനും ചായഗ്രഹകനുമായ സന്തോഷ്‌ ശിവന്റെ ശ്രദ്ധയിൽ പെടുകയും തുടർന്ന് അതുലിനെ തേടി അവസരങ്ങൾ എത്തുകയുമായിരുന്നു. മമ്മൂട്ടി ചിത്രം പുഴു വിലെ ‘കൊമ്പെടുത്തൊരു വമ്പ് കാണിച്ചു ‘ എന്ന ഗാനം ആലപിച്ചുകൊണ്ടാണ് അതുൽ സിനിമാലോകത്തേക്ക് ചുവടുവയ്ക്കുന്നത്.
എം. ടി വാസുദേവൻ നായരുടെ 10 ചെറുകഥകളെ ആസ്പദമാക്കി സന്തോഷ്‌ ശിവൻ സംവിധാനം ചെയ്യുന്ന ‘ അഭയം തേടി വീണ്ടും ‘ എന്ന സിനിമയുടെ ഭാഗമായാണ് സംഗീതസംവിധായകൻ ജേക്സ് ബിജോയെ പരിചയപ്പെടുന്നത്.10 വർഷമായി അതുൽ നാടൻപാട്ട് രംഗത്തുണ്ട്. സംസ്ഥാന, സ്കൂൾ കലോത്സവങ്ങളിലൂടെയാണ് നാടൻപാട്ടിലേക്കുള്ള പ്രവേശനം. കാലിക്കറ്റ്‌ യൂണിവേഴ്സിറ്റിക്കു വേണ്ടി രണ്ട് തവണ സൗത്ത് സോണിലും ദേശീയ മത്സരങ്ങളിലും സമ്മാനങ്ങൾ വാങ്ങിയിട്ടുണ്ട്. 2019 ൽ കേരള ഫോക് ലോർ അവാർഡും 2020 ൽ കലാഭവൻമണി ഓടപ്പഴം അവാർഡും നേടിയിട്ടുണ്ട് . സാംസ്‌കാരിക വകുപ്പിന്റെ യുവ നാടൻപാട്ട് കലാകാരനുള്ള വജ്ര ജൂബിലി ഫെല്ലോഷിപ്പും അതുൽ കരസ്തമാക്കിയിട്ടുണ്ട്. നിലവിൽ കാലിക്കറ്റ്‌ യൂണിവേഴ്സിറ്റിയിലെ ഗവേഷക വിദ്യാർഥിയാണ്.
ഇതിനോടകം തന്നെ കേരളത്തിലെ വിവിധ വേദികളിലായി നാടൻപാട്ടുകൾ അവതരിപ്പിച്ചു കൊണ്ടിരിക്കുകയാണ് സംഘം. പാലപ്പള്ളി ഹിറ്റി നിരയിലേക്കെത്തിയതോടെ വലിയ ജനപ്രീതിയാണ് ഇന്ന് സോൾ ഓഫ് ഫോകും നേടിയത്. സെപ്റ്റംബർ ഒൻപതിന് ഖത്തറിൽ വച്ച് മലയാളി അസോസിയേഷൻ സംഘടിപ്പിക്കുന്ന ഓണാഘോഷ പരിപാടിയിൽ പങ്കെടുക്കാനായി സ്വപ്നങ്ങളുമായി പറക്കാനൊരുങ്ങുകയാണ് സോൾ ഓഫ് ഫോക്.
