ലോകത്തിലെ ഏറ്റവും വലിയ ധനികനാരാണെന്ന് അറിയേണ്ടേ. അംബാനിയും അദാനിയും മസ്കുമൊന്നുമല്ല ഇത്തവണ ഒന്നാമതെത്തിയത്. ആമസോൺ സ്ഥാപകനും മുൻ സിഇഒയുമായ ജെഫ് ബെസോസ് ആണ് സമ്പന്നരുടെ പട്ടികയിൽ ഒന്നാമത്. 200.3 ബില്യൺ ഡോളറാണ് ബെസോസിന്റെ ആസ്തി. കഴിഞ്ഞ ഒമ്പത് മാസമായി ബ്ലൂംബെർഗ് ബില്യണയർ സൂചികയിൽ ഒന്നാം സ്ഥാനത്ത് നിന്ന ടെസ്ല സിഇഒ ഇലോൺ മസ്കിനെ പിന്തള്ളിയാണ് ജെഫ് ബെസോസ് മുൻപന്തിയിലെത്തിയത്.
തിങ്കളാഴ്ച ടെസ്ല ഇൻകോർപ്പറേറ്റിലെ ഓഹരികൾ 7.2 ശതമാനം ഇടിഞ്ഞതോടെയാണ് മസ്ക് രണ്ടാം സ്ഥാനത്തേയ്ക്ക് പിന്തള്ളപ്പെട്ടത്. 197.7 ബില്യൺ ഡോളറാണ് മസ്ക‌കിൻ്റെ ഇപ്പോഴത്തെ ആസ്തി. റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി പട്ടികയിൽ 11-ാം സ്ഥാനത്തും അദാനി ഗ്രൂപ്പ് ചെയർമാൻ ഗൗതം അദാനി 12-ാം സ്ഥാനത്തുമാണ് നിലയുറപ്പിച്ചിരിക്കുന്നത്. 2017ൽ മൈക്രോസോഫ്റ്റ് സ്ഥാപകൻ ബിൽ ഗേറ്റ്സിൻ്റെ ആസ്‌തിയെ മറികടന്ന് ബെസോസ് ആദ്യമായി ലോകത്തിലെ ഏറ്റവും സമ്പന്നനായ വ്യക്തിയായി മാറിയിരുന്നു.
2023 മെയ് മാസത്തിൽ ബെർണാഡ് അർനോൾട്ടിനെ പിന്തള്ളിയാണ് മസ്ക് ലോകത്തിലെ ഏറ്റവും ധനികൻ എന്ന പദവി നേടിയത്. ലൂയി വട്ടോൺ, ഡിയോർ, ടിഫാനി തുടങ്ങിയ ബ്രാൻഡുകളുടെ ഉടമകളായ ഫ്രഞ്ച് കമ്പനി എൽ.വി.എം.എച്ചിന്റെ സിഇഒയും ചെയർമാനുമാണ് ബെർണാഡ്.
