ആശ്രിത നിയമനം അവകാശമല്ലെന്ന നിരീക്ഷണവുമായി സുപ്രീം കോടതി. ആശ്രിത നിയമനത്തെ അവകാശമായി കാണരുതെന്നും കേവലം ആനുകൂല്യം മാത്രമാണെന്നും സുപ്രീം കോടതി ചൂണ്ടിക്കാട്ടി. ജസ്റ്റിസുമാരായ എം ആര്‍ ഷാ, കൃഷ്ണ മുരാരി എന്നിവരടങ്ങിയ ബഞ്ചിൻ്റേതാണ് ഉത്തരവ്. ഫെര്‍ടിലൈസേഴ്‌സ് ആന്‍ഡ് കെമിക്കല്‍സ് ട്രാവന്‍കൂര്‍ (ഫാക്ട്) എന്ന സ്ഥാപനത്തില്‍ ആശ്രിത നിമനം നല്‍കണമെന്ന കേരളത്തില്‍ നിന്നുള്ള യുവതിയുടെ ആവശ്യം സുപ്രീം കോടതി തള്ളിക്കൊണ്ടാണ് ഉത്തരവ്.
പിതാവ് സര്‍വീസിലിരിക്കെ മരിച്ചതിനാല്‍ ആശ്രിത നിയമനം നൽകണമെന്നായിരുന്നു യുവതിയുടെ ആവശ്യം. എന്നാൽ യുവതി അമ്മയോടൊപ്പമല്ല നിലവിൽ താമസമെന്ന് മനസിലാക്കിയ സുപ്രീം കോടതി അപ്പീല്‍ തള്ളുകയായിരുന്നു. 1995ലാണ് യുവതിയുടെ പിതാവ് മരിക്കുന്നത്. ആശ്രിത നിയമനത്തിനായുള്ള യുവതിയുടെ ഹര്‍ജി പരിഗണിക്കാന്‍ കമ്പനിയോട് ഹൈക്കോടതി നിര്‍ദേശിച്ചിരുന്നു. ഈ ഉത്തരവിനെതിരെയാണ് ഫാക്ട് സുപ്രീം കോടതിയെ സമീപിച്ചത്.
ഒരാൾ മരണപ്പെടുമ്പോള്‍ അയാളെ ആശ്രയിച്ചു ജീവിക്കുന്നവര്‍ക്ക് പിന്നീട് ഉപജീവനമാര്‍ഗമില്ലാത്ത ഘട്ടത്തിലാണ് ആനുകൂല്യമെന്ന നിലയില്‍ ആശ്രിത നിയമനം നല്‍കുന്നതെന്ന് സുപ്രീം കോടതി വ്യക്തമാക്കി. എന്നാല്‍ മരിച്ചവരുടെ ബന്ധുക്കള്‍ക്ക് ഇതിനെ ഒരു അവകാശമായി കണ്ട് നിയമനത്തിനായി വാദിക്കാനാകില്ലെന്നും സുപ്രീം കോടതി വ്യക്തമാക്കി.
