ലൈംഗിക ബന്ധത്തിന് അനുമതി നൽകുന്നതിൽ പ്രായപരിധി കുറയ്ക്കുന്നതുമായി ബന്ധപ്പെട്ട് കേന്ദ്ര വനിതാ ശിശുക്ഷേമ മന്ത്രാലയത്തോട് കേന്ദ്ര നിയമ കമ്മീഷന്‍ അഭിപ്രായം തേടി. പ്രായപരിധി 18- ല്‍ നിന്ന് 16 ആക്കി കുറയ്ക്കാനാണ് പരിഗണിക്കുന്നത്.
നിലവിൽ 18 വയസ്സിന് താഴെ പ്രായമുള്ള കുട്ടികളുമായി ലൈംഗികബന്ധത്തിൽ ഏർപ്പെടുന്നതിന് അനുമതിയുണ്ടെങ്കിലും ഇന്ത്യയില്‍ അത് കുറ്റകരമാണ്. ഇത്തരം സംഭവങ്ങളില്‍ പോക്‌സോ വകുപ്പ് പ്രകാരം കേസ് രജിസ്റ്റര്‍ ചെയ്ത് നടപടി സ്വീകരിക്കുകയാണ് പതിവ്. എന്നാല്‍ പല സംസ്ഥാനങ്ങളിലും 16 വയസ്സ് കഴിഞ്ഞവര്‍ പ്രണയത്തിലാവുകയും പരസ്പര സമ്മതത്തോടെ ലൈംഗികബന്ധത്തില്‍ ഏര്‍പ്പെടുകയും ചെയ്യുന്ന നിരവധി സംഭവങ്ങള്‍ കോടതികള്‍ക്ക് മുന്നില്‍ വന്നിട്ടുണ്ട്.
അതേസമയം ഇത്തരം കേസുകളില്‍ പ്രായപരിധിയിലെ വ്യത്യാസത്തിന് നിയമനിര്‍മ്മാണം സാധ്യമാണോ എന്ന കാര്യത്തെക്കുറിച്ച് കര്‍ണാടക, മധ്യപ്രദേശ് ഹൈക്കോടതികള്‍ കേന്ദ്ര നിയമ കമ്മീഷനോട് അഭിപ്രായം ചോദിച്ചിരുന്നു. ഇതിനെ തുടര്‍ന്നാണ് ഇപ്പോഴത്തെ നടപടി. മെയ് 31-ന് വനിത ശിശുക്ഷേമ മന്ത്രാലയത്തിന് ഇക്കാര്യത്തില്‍ നിലപാട് വ്യക്തമാക്കാൻ അവശ്യപ്പെട്ടുകൊണ്ട് കേന്ദ്ര നിയമ കമ്മീഷന്‍ കത്ത് അയച്ചിരുന്നു.
ഇത് സംബന്ധിച്ച് ഇപ്പോഴത്തെ നിലപാട് സമൂഹ്യ യാഥാർഥ്യം കൂടി പരിഗണിച്ചുകൊണ്ട് പുനഃപരിശോധിക്കണമെന്നാണ് കത്തില്‍ പറഞ്ഞിട്ടുണ്ട്. ഇപ്പോഴും ഇന്ത്യയിലെ ചില ഗോത്ര വിഭാഗങ്ങളില്‍പ്പെട്ടവർ ചെറിയ പ്രായത്തില്‍ വിവാഹം കഴിക്കുന്നുണ്ട്. അതുകൊണ്ട് തന്നെ പരസ്പരം വിവാഹിതരായതിന് ശേഷവും ആളുകള്‍ പോക്‌സോ കേസില്‍ അറസ്റ്റിലായി ജയിയില്‍ കിടക്കേണ്ടി വരുന്നുണ്ട് എന്ന വിഷയവും പുതിയ നിലപാടിൽ ചൂണ്ടിക്കാട്ടുന്നു.
