ഇന്ത്യയുടെ 75-ാം സ്വാതന്ത്ര്യ ദിനത്തിൽ എല്ലാ വീടുകളിലും ദേശീയ പതാക ഉയരണമെന്നാണ് പ്രധാനമന്ത്രി നരേന്ദ്ര മോദിയുടെ ആഹ്വാനം. ‘ഹർ ഖർ തിരംഗ’ എന്ന പദ്ധതി അനുസരിച്ച് ഓഗസ്റ്റ് 13 മുതൽ 15 വരെയുള്ള ദിവസങ്ങളിൽ എല്ലാ വീടുകളിലും ദേശീയ പതാക ഉയരും. ദേശീയ പതാക വളരെ ശ്രദ്ധയോടെ കൈകാര്യം ചെയ്യേണ്ടതാണ്. കൂടാതെ ദേശീയ പതാകയെ അപമാനിക്കുന്നത് ശിക്ഷാർഹവുമാണ്.
ദേശീയ പതാക വീടുകളിൽ ഉയർത്തുമ്പോൾ ശ്രദ്ധിക്കേണ്ട കാര്യങ്ങൾ:
▪️ദേശീയ പതാക നിർമിക്കാൻ ഖാദി, പരുത്തി എന്നിവ മാത്രമാണ് ഉപയോഗിച്ചിരുന്നതെങ്കിലും 2021 ഡിസംബർ 30ന് ഫ്‌ളാഗ് കോഡ് ഓഫ് ഇന്ത്യയുടെ ഭേദഗതി പ്രകാരം വൂൾ, സിൽക്ക്, പോളിസ്റ്റർ എന്നിവയിൽ കൈകൊണ്ടോ മെഷീനിലോ ദേശീയ പതാക നിർമിക്കാം.
▪️2022 ജൂലൈ 20ന് കേന്ദ്ര സർക്കാർ ഭേദഗതി വരുത്തിയ പ്രകാരം രാത്രിയും പകലുമെല്ലാം ദേശീയ പതാക നാട്ടാവുന്നതാണ്. മുൻപ് സൂര്യോദയത്തിനും സൂര്യാസ്തമയത്തിനുമിടയിൽ മാത്രമേ കൊടി നാട്ടാൻ അനുവാദമുണ്ടായിരുന്നുള്ളു.
▪️ആദ്യം സാഫ്രൺ, ഏറ്റവും താഴെ പച്ച എന്ന ക്രമത്തിലാണ് പതാക നാട്ടേണ്ടത്. കേട് സംഭവിച്ചതോ പഴയതോ ആയ പതാക നാട്ടാൻ പാടില്ല. അലങ്കാരവസ്തുവായോ റിബൺ രൂപത്തിലോ വളച്ച് കുത്താനും പാടില്ല.
▪️പതാക വേഗത്തിൽ ഉയർത്തുകയും, സാവധാനം താഴ്ത്തുകയും വേണം.
▪️ദേശീയ പതാകയുടെ ആകൃതി റെക്ടാംഗിൾ രൂപത്തിൽ 3:2 എന്ന അനുപാതത്തിലാണ് പതാക നിർമിക്കുക.
▪️കേടുപാടുകൾ സംഭവിച്ച പതാകകൾ കത്തിച്ച് കളയുകയോ, ബഹുമാനത്തോടെ മറ്റേതെങ്കിലും മാർഗത്തിൽ നശിപ്പിക്കുകയോ വേണം. ഒരു കാരണവശാലും വഴിയിലുപേക്ഷിക്കാനോ, ചവിറ്റുകൊട്ടയിൽ കളയാനോ പാടില്ല.
▪️ദേശീയ പതാകയെ അപമാനിക്കുന്നത് നാഷണൽ ഓണർ ആക്ട് 1971 പ്രകാരം ശിക്ഷാർഹമാണ്. ശ്രദ്ധയിൽപ്പെട്ടാൽ വ്യക്തിക്ക് മൂന്ന് വർഷം വരെ തടവോ, പിഴയോ, ഇത് രണ്ടുമോ ലഭിക്കും.
