രാജ്യത്ത് ഗോഹത്യ നടത്തിയതിന് പിന്നാലെ നടക്കുന്ന കൊലപാതകങ്ങളിൽ വിവാദ പ്രസ്താവനയുമായി ബിജെപി നേതാവ്. ‘പശുവിനെ കശാപ്പ് ചെയ്യുന്നവരെ കൊല്ലണം. ഇതുവരെ ഞങ്ങൾ അഞ്ച് പേരെ കൊന്നു’, ബിജെപി മുന്‍ എംഎല്‍എ ഗ്യാന്‍ ദേവ് അഹൂജയുടെ വാക്കുകളാണിത്. പ്രസംഗത്തിന്റെ വിഡിയോ ദൃശ്യങ്ങള്‍ സമൂഹമാധ്യമങ്ങളില്‍ വ്യാപകമായി പ്രചരിക്കുകയാണ്.
2017ലും 2018ലുമാണ് രണ്ട് കൊലപാതകങ്ങള്‍ നടന്നിരിക്കുന്നത്. ഒന്ന് ഗ്യാന്‍ ദേവ് അഹൂജ എംഎല്‍എ ആയിരുന്ന രാംഗറിലാണ് സംഭവിച്ചത്. പെഹ്ലുഖാന്റെയും രഖ്ബര്‍ ഖാന്റെയും കൊലപാതകങ്ങളെയാണ് രണ്ടെണ്ണം എന്ന് പറഞ്ഞിരിക്കുന്നത്. കൊല്ലപ്പെട്ട മറ്റ് മൂന്നുപേരുടെ പേര് ബിജെപി എംഎൽഎ പുറത്തുവിട്ടില്ല.
‘ഞാനവര്‍ക്ക് കൊല്ലാനുള്ള സ്വാതന്ത്ര്യം നല്‍കിയതാണ്. ഞങ്ങള്‍ അവരെ രക്ഷിച്ച് ജാമ്യം വാങ്ങിനൽകും.’ ഗ്യാന്‍ ദേവ് അഹൂജ വിവാദമായ വിഡിയോയില്‍ പറയുന്നു. പെഹ്ലു ഖാന്റെ കൊലപാതകത്തിലെ ആറ് പ്രതികളെയും 2019ല്‍ വെറുതെവിട്ടിരുന്നു. എന്നാൽ അപ്പീല്‍ ഇപ്പോഴും ഹൈക്കോടതിയുടെ പരിഗണനയിലാണുള്ളത്. രഖ്ബര്‍ ഖാന്റെ കൊലപാതകത്തില്‍ ഇപ്പോഴും വിചാരണ തുടരുകയാണ്.
വിഡിയോ പ്രചരിച്ചതോടെ അഹൂജയ്‌ക്കെതിരെ വര്‍ഗീയ സംഘര്‍ഷം ആഹ്വാനം ചെയ്തതിന്റെ പേരിൽ പൊലീസ് കേസെടുത്തു. കൊലപാതകികള്‍ ദേശസ്‌നേഹികളാണെന്നും ഛത്രപതി ശിവജിയുടെയും ഗുരു ഗോവിന്ദ് സിങിന്റെയും യഥാര്‍ത്ഥ പിന്‍ഗാമികളാണെന്നും മുൻപ് ഒരിക്കൽ ബിജെപി നേതാവ് പറഞ്ഞിട്ടുണ്ട്.
ബിജെപി ആകട്ടെ മുന്‍ എംഎല്‍എയുടെ പരാമര്‍ശം തള്ളി. അഹൂജയുടേത് വ്യക്തിപരമായ അഭിപ്രായം മാത്രമാണെന്നും പാര്‍ട്ടിക്ക് പങ്കില്ലെന്നുമാണ് അൽവാർ യൂണിറ്റിന്റെ വിശദീകരണം.
