ഇന്ത്യയിൽ പ്രതിദിന കൊവിഡ് കേസുകൾ വർധിക്കുന്ന സാഹചര്യത്തിൽ അഞ്ച് സംസ്ഥാനങ്ങൾക്ക് ജാഗ്രതാ നിർദേശം നൽകി കേന്ദ്രം. കേരളം, തമിഴ്‌നാട്, കർണാടക, തെലങ്കാന, മഹാരാഷ്ട്ര എന്നീ സംസ്ഥാനൾക്കാണ് ജാഗ്രത പാലിക്കാൻ കേന്ദ്രം നിർദേശം നൽകിയത്.
ഇന്നലെ ആരോഗ്യ മന്ത്രാലയത്തിന്റെ കണക്കുകൾ പ്രകാരം 4,033 പേർക്കാണ് രാജ്യത്ത് കൊവിഡ് സ്ഥിരീകരിച്ചത്. മാർച്ച് 10ന് ശേഷം ആദ്യമായാണ് പ്രതിദിന കൊവിഡ് കണക്ക് നാലായിരത്തിൽ എത്തുന്നത്. ചില സംസ്ഥാനങ്ങളിൽ കൊവിഡ് കേസുകൾ രാജ്യത്തെ വർധനയ്ക്ക് കാരണമെന്നും ജാഗ്രത വേണമെന്നും കേന്ദ്ര ആരോഗ്യ സെക്രട്ടറി രാജേഷ് ഭൂഷൺ അറിയിച്ചു.
കേന്ദ്ര സർക്കാർ ഏപ്രിൽ 18ന് സംസ്ഥാനങ്ങൾക്ക് നൽകിയ കത്തിലെ നിർദേശങ്ങൾ അനുസരിക്കണമെന്നും വാക്‌സിനേഷൻ, പരിശോധന, നിരീക്ഷണം എന്നിവ കർശനമായി പാലിക്കണമെന്നും രാജേഷ് ഭൂഷൺ വ്യക്തമാക്കി.
