ഷിരൂരിലെ മണ്ണിടിച്ചിലിൽ അകപ്പെട്ട് മരണപ്പെട്ട അർജുന്റെ കുടുംബത്തിന് സഹായധനം പ്രഖ്യാപിച്ച് മുഖ്യമന്ത്രി പിണറായി വിജയൻ. അർജുന്റെ കുടുംബത്തിന് 7 ലക്ഷം രൂപ ധനസഹായം നൽകുമെന്നാണ് മുഖ്യമന്ത്രി വാർത്താസമ്മേളനത്തിൽ അറിയിച്ചത്.
കഴിഞ്ഞ ജൂലൈ 16-നാണ് കർണാടകയിലെ ദേശീയപാത 66ൽ ഷിരൂരിൽ ഉണ്ടായ മണ്ണിടിച്ചിൽ അർജുനെ കാണാതാകുന്നത്. തുടർച്ചയായി നടത്തിയ തിരച്ചിലുകൾക്കൊടുവിൽ കാണാതായി 72-ാം ദിവസമാണ് ഗംഗാവലിപ്പുഴയുടെ ആഴങ്ങളിൽ നിന്നും അർജുനെയും ലോറിയെയും കണ്ടെടുക്കുന്നത്.
ലോറിക്കുള്ളിൽ നിന്ന് കണ്ടെത്തിയ മൃതദേഹം അർജുന്റേത് തന്നെയാണെന്ന് ഡിഎൻഎ പരിശോധനയിൽ വ്യക്തമാകുകയും ചെയ്തിരുന്നു. അർജുനെ കാണാതായി ദിവസങ്ങൾക്കുള്ളിൽ തന്നെ അർജുന്റെ ഭാര്യ കൃഷ്ണപ്രിയക്ക് സഹകരണ ബാങ്കിൽ ജോലിയും നൽകിയിരുന്നു.
