ഗുരുതരാവസ്ഥയിലുള്ള രോഗികളെ തീവ്രപരിചരണ വിഭാഗത്തിൽ പ്രവേശിപ്പിക്കുന്നത് സംബന്ധിച്ച് മാർഗനിർദ്ദേശങ്ങളുമായി കേന്ദ്ര ആരോഗ്യ മന്ത്രാലയം. ഇതുപ്രകാരം ബന്ധുക്കളുടെ അനുമതി ഇല്ലാതെ രോഗികളെ ഐ.സി.യുവിൽ പ്രവേശിപ്പിക്കാൻ ആശുപത്രി അധികൃതർക്ക് സാധിക്കില്ല. 24 അംഗങ്ങളുള്ള വിദഗ്ധസംഘമാണ് മാർഗനിർദ്ദേശത്തിന് രൂപം നൽകിയത്.
അവയവങ്ങൾ ഗുരുതരമായി തകരാറിലാകുക, ജീവൻരക്ഷാ ഉപകരണങ്ങൾ ആവശ്യമായി വരിക, ആരോഗ്യനില വഷളാകാനുള്ള സാധ്യത മുന്നിൽ കാണുക, രക്തസമ്മർദ്ദത്തിലെ വ്യതിയാനം, വെന്റിലേറ്റർ ആവശ്യമായ സാഹചര്യം, തീവ്ര നിരീക്ഷണത്തിന്റെ ആവശ്യകത എന്നിവയെ അടിസ്ഥാനമാക്കിയാകണം ഐ.സി.യു പ്രവേശനത്തിനുള്ള മാനദണ്ഡം നിർണയിക്കേണ്ടതെന്നാണ് ആരോഗ്യ മന്ത്രാലയം വ്യക്തമാക്കിയത്.
തന്നെ ഐ.സി.യുവിൽ പ്രവേശിപ്പിക്കരുതെന്ന് രോഗി മുൻകൂട്ടി ആവശ്യപ്പെടുന്ന സാഹചര്യത്തിൽ രോഗിയെ ആശുപത്രി ജീവനക്കാർക്ക് തീവ്രപരിചരണ വിഭാഗത്തിൽ പ്രവേശിപ്പിക്കാൻ സാധിക്കില്ല. കൂടാതെ കൂടുതൽ ചികിത്സ സാധ്യമാകാത്ത സാഹചര്യത്തിലും ജീവൻ രക്ഷിക്കാൻ കഴിയാത്ത സാഹചര്യത്തിലും ചികിത്സ തുടരുന്നതുകൊണ്ട് കാര്യമായ പുരോഗതി ഉണ്ടാകില്ല എന്നുറപ്പുള്ള സാഹചര്യത്തിലും രോഗിയെ ഐ.സി.യുവിൽ കിടത്തുന്നതിൽ അർത്ഥമില്ലെന്നും മാർഗനിർദ്ദേശത്തിൽ പറയുന്നുണ്ട്.
ഇതിനോടൊപ്പം ഐ.സി.യുവിൽ നിന്ന് രോഗികളെ ഡിസ്‌ചാർജ് ചെയ്യുന്നത് സംബന്ധിച്ച മാനദണ്ഡങ്ങളും ആരോഗ്യമന്ത്രാലയം നിർദ്ദേശിച്ചിട്ടുണ്ട്. ആരോഗ്യനില സാധാരണ അവസ്ഥയിലേക്ക് മടങ്ങിയെത്തുക, ഐ.സി.യുവിൽ പ്രവേശിപ്പിക്കുന്നതിന് കാരണമായ രോഗാവസ്ഥ നിയന്ത്രണത്തിലാകുക, പാലിയേറ്റീവ് കെയർ നിർദ്ദേശിക്കപ്പെടുക എന്നീ സാഹചര്യങ്ങളിലും രോഗിയോ കുടുംബമോ ആവശ്യപ്പെടുന്ന സാഹചര്യത്തിലും രോഗിയെ ഐ.സി.യുവിൽ നിന്ന് ഡിസ്‌ചാർജ് ചെയ്യണമെന്നാണ് നിർദ്ദേശം.
