യുഎഇയുടെ ദേശീയ വിമാനക്കമ്പനിയായ ഇത്തിഹാദ് എയര്‍വേയ്‌സിൻ്റെ പുതിയ ബ്രാന്‍ഡ് അംബാസഡറായി ബോളിവുഡ് നടി കത്രീന കൈഫിനെ നിയമിച്ചു.കത്രീന അഭിനയിച്ച ഇത്തിഹാദ് എയര്‍വേയ്‌സിൻ്റെ ആദ്യ പരസ്യചിത്രവും ഇതിനകം പുറത്തിറങ്ങി. വിമാനയാത്രാ സൗകര്യം, സേവന നിലവാരം, ആഗോള കണക്റ്റിവിറ്റി എന്നിവയില്‍ ഇത്തിഹാദ് എയര്‍വേയ്‌സിൻ്റെ മികവ് വ്യക്തമാക്കുന്ന പരസ്യങ്ങളിലും ക്യാമ്പൈനുകളിലും കത്രീന കൈഫ് പ്രത്യക്ഷപ്പെടും.
ഇത്തിഹാദ് എയര്‍വേയ്‌സിൻ്റെ ഏറ്റവും പുതിയ എ350 വിമാനത്തില്‍ യാത്ര ചെയ്യുന്ന കത്രീന കൈഫിനെ ആദ്യ പരസ്യ ചിത്രത്തിൽ കാണാം. എയർലൈനിൻ്റെ സവിശേഷതകളും സേവനങ്ങളും ആഡംബരവും വ്യക്തമാക്കുന്നതാണ് വീഡിയോ. കേരളം ഉൾപ്പടെ ഇന്ത്യൻ നഗരങ്ങളിലേക്ക് പുതിയ സർവ്വീസുകൾ പ്രഖ്യാപിച്ചതിന് പിന്നാലെയാണ് ഇത്തിഹാദ് എയർലൈൻ കത്രീനയെ ബ്രാൻഡ് അംബാസിഡറായി നിയമിച്ചത്. നിലവിൽ എട്ട് ഇന്ത്യന്‍ നഗരങ്ങളിലേക്ക് ഇത്തിഹാദിന് സര്‍വീസുണ്ട്
2010ല്‍ ഇത്തിഹാദ് പുറത്തിറക്കിയ പരസ്യത്തിലും കത്രീന പ്രത്യക്ഷപ്പെട്ടിരുന്നു. അതേസമയം ആഗോള ബ്രാന്‍ഡ് അംബാസഡർ എന്ന നിലയിൽ കത്രീന കൈഫിനൊപ്പം ഒരുമിക്കാൻ കഴിഞ്ഞതില്‍ സന്തോഷമുണ്ടെന്ന് ഇത്തിഹാദ് എയര്‍വേസ് അധികൃതർ എക്‌സ് പ്ലാറ്റ്‌ഫോമില്‍ കുറിച്ചു. ഇത്തിഹാദ് കുടുംബത്തിലേക്ക് കത്രീനയെ സ്വാഗതം ചെയ്യുന്നതായി എയര്‍വേയ്‌സിന്റെ ബ്രാന്‍ഡ്, മാര്‍ക്കറ്റിങ്, സ്‌പോണ്‍സര്‍ഷിപ്പ് വൈസ് പ്രസിഡന്റ് അമീന താഹര്‍ പറഞ്ഞു.
