നടിയെ അക്രമിച്ച കേസിൽ അതിജീവിത നൽകിയ ഹർജി പരിഗണിക്കുന്നത് ഹൈക്കോടതി ബുധനാഴ്ചത്തേക്ക് മാറ്റി. കേസിൽ വിശദീകരണം നൽകാൻ സർക്കാരിന് കൂടുതൽ സമയം വേണമെന്ന് അറിയിച്ചതിനെ തുടർന്നാണ് മാറ്റിയത്. തുടരന്വേഷണത്തിന് മൂന്ന് മാസം കൂടി അനുവദിക്കണമെന്നും സർക്കാർ ഹൈക്കോടതിയോട് ആവശ്യപ്പെട്ടു.
നടിയെ അക്രമിച്ച കേസ് അട്ടിമറിയ്ക്കാൻ ശ്രമമെന്ന് ആരോപിച്ച് അതിജീവിത നൽകിയ ഹർജിയിൽ ഉന്നയിച്ച പ്രധാന വാദങ്ങൾ നിലനിൽക്കുന്നതല്ലെന്നാണ് സർക്കാർ നിലപാട്. ദൃശ്യങ്ങൾ ചോർന്നതിൽ അന്വേഷണം വേണമെന്ന പ്രോസിക്യൂഷൻ ആവശ്യം വിചാരണ കോടതി തളളിയതാണെന്നും സർക്കാർ ബുധനാഴ്ച ഹൈക്കോടതിയെ അറിയിക്കും. ജസ്റ്റിസ് സിയാദ് റഹ്മാൻ്റെ ബെഞ്ചാണ് കേസ് പരിഗണിക്കുക.
