ലോകത്തിലെ ഏറ്റവും സുരക്ഷിത നഗരമായി അബുദാബി. തുടര്‍ച്ചയായ ആറാം വര്‍ഷമാണ് അബുദാബി നേട്ടം നിലനിര്‍ത്തുന്നത്. ആഗോള ഡേറ്റാ പ്ളാറ്റ്ഫോമായ നമ്പിയോയുടെ 2021ലെ സര്‍വ്വേയിലാണ് അബുദാബിയുടെ നേട്ടം.
അതേസമയം ഇക്കണോമിക്സ് ഇന്‍റലിജന്‍സ് യൂണിറ്റിന്‍റെ അനലറ്റിക്കല്‍ ഇക്കണോമിക്സ് മാസിക നടത്തിയ സര്‍വ്വേയില്‍ വ്യക്തിഗത സുരക്ഷാസൂചികയിലും അബുദാബി നേട്ടം കണ്ടു. 29-ല്‍നിന്ന് 11-ാം സ്ഥാനത്തേക്കാണ് ഉയര്‍ന്നത്. മധ്യപൂര്‍വ്വ മേഖലയിയലെ സുരക്ഷിത നഗരമെന്ന ബഹുമതി അഞ്ചാം വര്‍ഷവും അബുദാബി സ്വന്തമാക്കി.
വലിയ നഗരങ്ങളുടെ പട്ടികയില്‍ അടിസ്ഥാന വികസനങ്ങൾ നടപ്പാക്കുക, വളര്‍ച്ച രേഖപ്പെടുത്തുക, ജനങ്ങളുടെ സൗര്യജീവിതം, നഗരാസൂത്രണ മികവ് എന്നിവ അടിസ്ഥാനമാക്കിയാണ് സര്‍വ്വേ നടന്നത്. സ്ത്രീസുരക്ഷയിലും നഗരം മുന്‍പന്തിയിലാണ്. ഗുരുതര കുറ്റകൃത്യങ്ങൾ 57 ശതമാനം കുറഞ്ഞെന്നാണ് പൊലീസ് കണക്കുകൾ സൂചിപ്പിക്കുന്നത്. സൈബര്‍ കേസുകളിലും ലഹരി ഉപയോഗത്തിലും കുറവ് രേഖപ്പെടുത്തുന്നതും അബുദാബിയെ മുന്നിലെത്തിച്ചു.
