പ്രായം വെറും അക്കങ്ങൾ മാത്രമാണെന്ന് തെളിയിച്ച് 70-കാരനായ റഷീദ്. തന്റെ പ്രായത്തെ ഗൗനിക്കാതെ ജോലിക്കായി ഇന്റർവ്യൂവിന് എത്തിയ റഷീദിനെ കയ്യടികളോടെയാണ് സാമൂഹ്യമാധ്യമങ്ങൾ എതിരേൽക്കുന്നത്.
ലുലു ഗ്രൂപ്പിൻ്റെ പുതിയ ഇന്റർവ്യൂ സെക്ഷനിലാണ് യുവാക്കളോടൊപ്പം റഷീദ് ക്യൂ നിന്നത്. ഇത് കണ്ട് പലരും മക്കളോടൊപ്പം വന്നതാണോ എന്ന തരത്തിൽ ചോദ്യങ്ങൾ ചോദിച്ചപ്പോൾ തെല്ലും ആശങ്കപ്പെടാതെ താൻ ഇന്റർവ്യൂവിന് വന്നതാണെന്നും കിട്ടിയാൽ ജോലിക്ക് പോകുമെന്നുമായിരുന്നു റഷീദിന്റെ മറുപടി. യുവാക്കൾക്കൊപ്പം ഇന്റർവ്യൂവിന് വന്ന് നിൽക്കാൻ കാണിച്ച ധൈര്യത്തെയാണ് എല്ലാവരും പ്രശംസിക്കുന്നത്.
38 വർഷം പ്രവാസിയായിരുന്ന റഷീദ് സാധിക്കുന്ന കാലമത്രയും ജോലി ചെയ്ത് സ്വന്തമായി പണം സമ്പാദിക്കണമെന്ന ആഗ്രഹവുമായാണ് ഇന്റർവ്യൂവിനെത്തിയത്. പ്രായം വെറും നമ്പർ മാത്രമാണെന്നും ജോലി ചെയ്യാനുള്ള മനസാണ് പ്രധാനമെന്നുമാണ് റഷീദിന്റെ കാഴ്ചപ്പാട്. അത് തുറന്നുപറയാൻ അദ്ദേഹത്തിന് യാതൊരു മടിയുമില്ല.
