ആഗോളതലത്തില്‍ കോവിഡ് 19ന്‍റെ ആഘാതം ഏറ്റവും അധികം ഏറ്റത് സാംസ്കാരിക മേഖലക്കെന്ന് യുനെസ്കോ. 2020-ൽ മാത്രം 10 ദശലക്ഷത്തിലധികം ജോലികൾ നഷ്‌ടപ്പെടുകയും വരുമാനത്തിൽ 40 ശതമാനം വരെ ഇടിവ് സംഭവിക്കുകയും ചെയ്തെന്ന് റിപ്പോര്‍ട്ട് സൂചിപ്പിക്കുന്നു. 2020-ൽ സാംസ്കാരിക മേഖലയുടെ മൊത്ത മൂല്യവർദ്ധിത വളര്‍ച്ചയില്‍ 25 ശതമാനം ഇടിവുണ്ടായെന്നും യുനെസ്കോ റിപ്പോര്‍ട്ടില്‍ പറയുന്നു.
പകര്‍ച്ച വ്യാധിയുടെ ആഘാതവും പുനരുജ്ജീവനവും എന്ന വിഷയത്തില്‍ അബുദാബി കൾച്ചറല്‍ ആന്‍റ് ടൂറിസം ഡിപ്പാര്‍ട്ട്മെന്‍ററും യുനെസ്കോയും ചേര്‍ന്ന് സംഘടിപ്പിച്ച പരിപാടിയിലാണ് റിപ്പോര്‍ട്ട് പ്രസിദ്ധീകരിച്ചത്. സാംസ്കാരിക മേഖലയെ പകർച്ചവ്യാധി സാരമായി ബാധിച്ചെങ്കിലും ഡിജിറ്റൽ ഉള്ളടക്കങ്ങളില്‍ വളര്‍ച്ച രേഖപ്പടുത്തിയെന്നും റിപ്പോര്‍ട്ട് വ്യക്തമാക്കി.
നൂറിലധികം വ്യവസായ റിപ്പോർട്ടുകളും 40 വിദഗ്ധ അഭിമുഖങ്ങളും, സാമ്പത്തിക വിശകലനങ്ങളും അടിസ്ഥാനമാക്കിയാണ് യുനെസ്കോ റിപ്പോര്‍ട്ട് തയ്യാറാക്കിയത്. സാംസ്കാരിക വൈവിധ്യത്തിന് പകർച്ചവ്യാധി വലിയ ഭീഷണിയാണ് ഉയര്‍ത്തുന്നത്. സാംസ്കാരിക പ്രവർത്തകരുടെ ഉപജീവനമാർഗത്തില്‍ അനിശ്ചിതത്വം വര്‍ദ്ധിച്ചു. നിരവധി കലാകാരന്‍മാരും സാംസ്കാരിക വിദഗ്ദ്ധരും മേഖല വിടാന്‍ കാരണമായത് ആവിഷ്കാര വൈവിധ്യത്തെ ദുര്‍ബലപ്പെടുത്തിയെന്നും റിപ്പോര്‍ട്ട് സൂചിപ്പിച്ചു. പ്രാദേശിക അസമത്വങ്ങൾ വര്‍ദ്ധിച്ചതും സാംസ്കാരിക മേഖലയെ ദുര്‍ബലപ്പെടുത്തിയെന്നാണ് വിലയിരുത്തല്‍.
കൊവിഡാനന്തര ലോകത്തിന്‍റെ കുതിപ്പിനും വികസന ലക്ഷ്യങ്ങൾക്കും സാമൂഹിക പരിവര്‍ത്തനത്തിനും സാംസ്കാരിക മേഖലയുടെ സജീവ പ്രവര്‍ത്തനം അനിവാര്യമാണ്. സാംസ്കാരിക മേഖലയെ പുനരുജ്ജീവിപ്പിക്കുന്ന പ്രവര്‍ത്തനങ്ങളെ പിന്തുണയ്ക്കേണ്ടതുണ്ടെന്നും യുനെസ്കോ അസിസ്റ്റന്റ് ഡയറക്ടർ ജനറൽ ഫോർ കൾച്ചർ ഏണെസ്റ്റോ ഓട്ടോണ്‍ പറഞ്ഞു. ഒരു അന്താരാഷ്ട്ര സാംസ്കാരിക സമൂഹമെന്ന നിലയിൽ മുന്നേറാൻ കഴിയണമെന്ന് ഡിസിടി അബുദാബി ചെയർമാൻ മുഹമ്മദ് ഖലീഫ അല്‍ മുബാറക് വ്യക്തമാക്കി.
ആഗോള പൊതുനന്മ എന്ന നിലയിൽ സംസ്കാരിക മേഖലയിലെ പ്രവര്‍ത്തനങ്ങൾ പുനഃസ്ഥാപിക്കുന്നതിനും മൂല്യം വർദ്ധിപ്പിക്കുന്നതിനുമുള്ള സുപ്രധാന അവസരമാണ് ഇപ്പോ‍ഴു‍ളളത്. സാംസ്കാരിക നയങ്ങളെയും സുസ്ഥിര വികസനത്തെയും കുറിച്ച് 2022 സെപ്തംബർ അവസാനം മെക്സിക്കോയിൽ നടക്കുന്ന യുനെസ്കോ വേൾഡ് കോൺഫറൻസ് ഇക്കാര്യത്തില്‍ കൃത്യമായ നിലപാട് സ്വീകരിക്കുമെന്നും റിപ്പോര്‍ട്ട് സൂചിപ്പിക്കുന്നു.
