യുഎഇയിലെ പറശ്ശിനിക്കടവ് സ്വദേശികളുടെ കൂട്ടായ്മയായ യുണൈറ്റഡ് പറശ്ശിനിയുടെ ആഭിമുഖ്യത്തിൽ ഷാർജയിൽ ഇഫ്താർ സംഗമവും മെമ്പർഷിപ്പ് വിതരണവും സംഘടിപ്പിച്ചു. സ്വന്തം നാടിനെ പ്രവാസ ലോകത്ത് നെഞ്ചേറ്റുന്നതിനൊപ്പം സൗഹൃദം ഊട്ടിയുറപ്പിക്കുകയും പരസ്പരം കൈത്താങ്ങാവുകയും ചെയ്യുക എന്ന ലക്ഷ്യത്തോടെയാണ് പരിപാടികൾ സംഘടിപ്പിച്ചത്.
ദുബൈയിലെ ബിസിനസ് പ്രമുഖനും ദുബായ് ഗവൺമെൻ്റ് അഡ്വാൻസ് പാരമെഡിക്കുമായ യൂസഫ് അലി ഹുസൈയിൻ കയാഫ് മുഖ്യാതിഥിയായി പങ്കെടുത്തു. പ്രവാസലോകത്തെ കൂട്ടായ്മകൾക്ക് പ്രസക്തി ഏറുന്ന കാലമാണിതെന്ന് അദ്ദേഹം പറഞ്ഞു.
കേരള ഫോക്ക്ലോർ അക്കാദമി അവാർഡ് ജേതാവും ഹൈദരാബാദിൽ അഞ്ഞൂറിൽ ഏറെ കലാകാരൻമാരെ പങ്കെടുപ്പിച്ച് ഒപ്പന അവതരിപ്പിച്ച് തെലുങ്കാനയുടെയും കേരള സർക്കാരിൻ്റെയും അംഗീകാരങ്ങൾ നേടിയ പ്രശസ്ത ഒപ്പന കലാകാരൻ നാസർ പറശ്ശിനിയെ ചടങ്ങിൽ ആദരിച്ചു.
രഘൂത്തമൻ കുന്നുമ്മൽ , പുഞ്ഞേൻ ഗംഗാധരൻ എന്നിവർക്ക് ആദ്യ മെമ്പർഷിപ്പ് നൽകികൊണ്ടാണ് യുണൈറ്റഡ് പറശ്ശിനിയുടെ മെമ്പർഷിപ്പ് പ്രവർത്തനത്തിന് തുടക്കം കുറിച്ചത്. ചടങ്ങിൽ സെക്രട്ടറി എം.മുജീബ് സ്വാഗതവും പ്രസിഡണ്ട് നിഖിൽ ചിറയിൽ അധ്യക്ഷതയും വഹിച്ചു. വരും ദിവസങ്ങളിൽ പ്രവാസലോകത്ത് സാനിധ്യമറിയിക്കുന്ന നിരവധി സാംസ്കാരിക പരിപാടികൾ സംഘടിപ്പിക്കുമെന്നും അംഗങ്ങളുടെ ക്ഷേമത്തിന് ആവശ്യമായ ഇടപെടലുകൾ ഉണ്ടാകുമെന്നും ഇരുവരും കൂട്ടിച്ചേർത്തു.
മുഖ്യ രക്ഷാധികാരികളായ രജിലാൽ കോക്കാടൻ, രാജേഷ് കുമാർ എന്നിവർ ആശംസയും ഷനു ഭാസ്കർ നന്ദിയും പറഞ്ഞു. പറശ്ശിനി സ്വദേശികളായ നൂറിലേറെപ്പേർ ഇഫ്താർ വിരുന്നിൽ പങ്കെടുത്തു.
