യുഎഇയുടെ സിവിൽ ഏവിയേഷൻ നെറ്റ്‌വർക്ക് പ്രതിദിനം ശരാശരി 400,000 യാത്രക്കാർക്കും പ്രതിമാസം 12 ദശലക്ഷത്തിലധികം യാത്രക്കാർക്കും സേവനം നൽകുന്നതായി കണക്കുകൾ. പ്രതിദിനം 10,000 ടണ്ണിലധികം ചരക്കുകളാണ് കൈകാര്യം ചെയ്യുന്നതെന്നും യുഎഇ സാമ്പത്തിക മന്ത്രി അബ്ദുല്ല ബിൻ തൗഖ് അൽ മർറി പറഞ്ഞു.
യു.എ.ഇയിലെ സിവിൽ ഏവിയേഷൻ മേഖലയിലെ മനുഷ്യ കേഡറുകളിൽ 9,400-ലധികം രജിസ്റ്റർ ചെയ്ത പൈലറ്റുമാരും 35,000-ലധികം എയർക്രാഫ്റ്റ് ക്രൂ അംഗങ്ങളും 4,400 മെയിൻ്റനൻസ് എഞ്ചിനീയർമാരും 463 എയർ ട്രാഫിക് കൺട്രോളറുകളും ഉൾപ്പെടുന്നുവെന്ന് സിവിൽ ഏവിയേഷൻ നേതാക്കൾക്കായുള്ള മൂന്നാമത്തെ അന്താരാഷ്ട്ര പരിപാടിയുടെ ഉദ്ഘാടന ദിനത്തിൽ അൽ മാരി വ്യക്തമാക്കി.
രാജ്യത്തെ വ്യോമഗതാഗത മേഖല ലോകത്തിലെ 90 ശതമാനത്തിലധികം രാജ്യങ്ങളുമായി സഹകരണവും പങ്കാളിത്ത കരാറുകളും വഴി ബന്ധിപ്പിച്ചിരിക്കുന്നു. മൊത്തം 189 എയർ ട്രാൻസ്പോർട്ട് സേവന കരാറുകളുണ്ടെന്നും ജനറൽ സിവിൽ ഏവിയേഷൻ അതോറിറ്റി ചെയർമാൻ കൂടിയായ അൽ മാരി കൂട്ടിച്ചേർത്തു.
2024ൻ്റെ ആദ്യ പകുതിയിൽ യുഎഇയിലെ വിമാനത്താവളങ്ങളിലെ യാത്രക്കാരുടെ എണ്ണത്തിൽ 14.2 ശതമാനം വർധനയുണ്ടായി. ഈ കാലയളവിൽ 71.75 ദശലക്ഷത്തിലധികം യാത്രക്കാരാണ് വിമാനത്താവളങ്ങളിലെത്തിയത്. കഴിഞ്ഞ വർഷം ഇത് 62.79 ദശലക്ഷമായിരുന്നു. യുഎഇയുടെ എയർ നെറ്റ്‌വർക്കിൻ്റെ 13 ശതമാനവും മിഡിൽ ഈസ്റ്റ് മേഖല കേന്ദ്രീകരിച്ചാണ്.
