ജിസിസി രാജ്യങ്ങളിലെ റെസിഡൻ്റ് വിസക്കാർക്കും പൗരന്മാർക്കും യുഎഇ സന്ദർശിക്കാൻ ഇ-വിസ ലഭ്യം. കുവൈത്ത്, സൗദി, ബഹ്റൈൻ, ഖത്തർ, ഒമാൻ എന്നീ രാജ്യങ്ങളിൽ ജോലി ചെയ്യുന്ന വിദേശികൾക്കും പൗരന്മാർക്കുമാണ് ഇ-വിസ ലഭിക്കുക.
പൗരന്മാർക്ക് 60 ദിവസത്തെയും വിദേശികൾക്ക് 30 ദിവസത്തെയും വിസയാണ് ലഭിക്കുക. തുല്യ കാലയളവിലേക്ക് ഒരു തവണ പുതുക്കാനും സാധിക്കും. പൗരന്മാർക്ക് മുമ്പ് വിസ കാലാവധി 30 ദിവസമായിരുന്നത് 30 ദിവസത്തേക്ക് കൂടി നീട്ടാമെന്ന് യുഎഇ ഡിജിറ്റൽ സർക്കാരാണ് പ്രഖ്യാപിച്ചത്. നേരത്തെ, ജിസിസി നിവാസികൾക്ക് യുഎഇയിൽ വിസ നീട്ടാൻ അനുവാദമില്ലായിരുന്നു. ആവശ്യമെങ്കിൽ അവർ രാജ്യം വിടുകയും പുതിയ എൻട്രി വിസയ്ക്ക് അപേക്ഷിക്കുകയുമായിരുന്നു ചെയ്യേണ്ടിയിരുന്നത്.
ഇ-വിസയ്ക്ക് അപേക്ഷിക്കാൻ കുറഞ്ഞത് ഒരു വർഷമെങ്കിലും കാലാവധിയുള്ള ജിസിസി വിസയും 6 മാസമെങ്കിലും കാലാവധിയുള്ള പാസ്പോർട്ടും ഉണ്ടായിരിക്കണം. ദുബായ് ജനറൽ ഡയറക്‌ടറേറ്റ് ഓഫ് റസിഡൻസി ഫോർ ഫോറിനേഴ്സ് അഫയേഴ്‌സ് (ജിഡിആർഎഫ്എ), ഫെഡറൽ അതോറിറ്റി ഫോർ ഐഡന്റിറ്റി ആന്റ് സിറ്റിസൻഷിപ്പ, കസ്റ്റംസ് ആന്റ് പോർട്ട് സെക്യൂരിറ്റി (ഐസിപി) എന്നിവയുടെ വെബ്സൈറ്റ്, സ്‌മാർട് ആപ്പ് എന്നിവയിലൂടെയാണ് ഇതിനായി അപേക്ഷ സമർപ്പിക്കേണ്ടത്.
