സുൽത്താൻ അൽ നെയാദിയെ എമിറേറ്റ്സ് എയർലൈൻസ് യുഎഇയിൽ പ്രത്യേക വിമാനം പറത്തി ആദരിച്ചു. രാജ്യാന്തര ബഹിരാകാശ നിലയത്തിൽ (ഐഎസ്എസ്) ഏറ്റവും ദൈർഘ്യമേറിയ അറബ് ബഹിരാകാശ ദൗത്യം കഴിഞ്ഞ് മടങ്ങിയെത്തിയതിന് ശേഷമായിരുന്നു ആദരിക്കൽ. രാജ്യത്തിന്റെ ബഹിരാകാശ നേട്ടങ്ങൾ ആഘോഷിക്കുന്നതിന്റെയും ഭാഗമായാണ് മുഹമ്മദ് ബിൻ റാഷിദ് സ്‌പേസ് സെന്ററുമായി (എംബിആർഎസ്സി) സഹകരിച്ച് എമിറേറ്റ്സ് ഇകെ 2641 ഒറ്റത്തവണ വിമാനം ചാർട്ടർ ചെയ്തത്.
അതേസമയം പര്യവേക്ഷണം 69-ന്റെ ആദ്യ യുഎഇ ബഹിരാകാശ യാത്രികൻ ഹസ്സ അൽ മൻസൂരിയും പദ്ധതിയുടെ ഭാഗമായിരുന്ന നാസ ബഹിരാകാശയാത്രികരും റഷ്യൻ ബഹിരാകാശയാത്രികരും അമേരിക്കൻ ബഹിരാകാശയാത്രികരായ സ്റ്റീഫൻ ബോവൻ, ഫ്രാൻസിസ്കോ റൂബിയോ, വാറൻ ഹോബർഗ് തുടങ്ങിയവരും റഷ്യൻ ബഹിരാകാശയാത്രികരായ സെർജി പ്രോകോപെവ്, ദിമിത്രി പെറ്റലിൻ, ആൻഡ്രി ഫെഡ്യേവ് എന്നിവരും അൽ നെയാദിക്കൊപ്പം ക്രൂവിൽ ഉണ്ട്. പബ്ലിക് അനൗൺസ്‌മെന്റ് സംവിധാനത്തിൽ പ്രത്യേക അറിയിപ്പുകളിലൂടെയാണ് എമിറേറ്റ്സ് ബഹിരാകാശ നായകന്മാർക്ക് ആദരവ് അർപ്പിച്ചത്.
എംബിആർഎസ്സി ഡയറക്ടർ ജനറൽ സാലെം ഹുമൈദ് അൽ മർറി, എമിറേറ്റ്‌സിന്റെ ചീഫ് ഓപ്പറേറ്റിങ് ഓഫീസർ അദേൽ അൽ റെധ തുടങ്ങി എം‌ബി‌ആർ‌എസ്‌സിയിലെ 200 ഓളം ജീവനക്കാരും ആഘോഷത്തിൽ പങ്കെടുത്തു. കൂടാതെ ഗ്രഹങ്ങളുടെ ആകൃതിയിലുള്ള മധുരപലഹാരങ്ങളും പലവ്യഞ്ജനങ്ങളും ഉൾക്കൊള്ളുന്ന ബഹിരാകാശ തീം മെനുവും വിമാനത്തിൽ ഉണ്ടായിരുന്നു. ക്യാപ്റ്റൻ അബ്ദല്ല അബ്ദുൽറഹ്മാൻ അൽ ഹമ്മാദിയുടെയും ഫസ്റ്റ് ഓഫിസർ അലക്‌സ് വാൻ ഡെർ വീറിന്റെയും കമാൻഡിൽ ഇകെ 2641 ദുബായ് രാജ്യാന്തര വിമാനത്താവളത്തിൽ നിന്ന് ഉച്ചയ്ക്ക് 12 നാണ് പുറപ്പെട്ടത്. 2 മണിക്കൂർ വിമാനം എല്ലാ എമിറേറ്റുകൾക്കും മുകളിലൂടെ പറക്കുകയും ഡോക്ടർ അൽ നെയാദിയുടെ ജന്മനാടായ അൽ ഐനിൽ ഒരു പ്രത്യേക ഫ്ലൈ പാസ്റ്റ് നടത്തുകയും ചെയ്തു.
