അബുദാബിയിലെ അൽ-സമീഹ് പ്രദേശത്ത് സൈനിക പരിശീലനം നടക്കുന്നതിനാൽ പ്രദേശത്ത് ഉയർന്ന ശബ്ദമുണ്ടാകാൻ സാധ്യതയുണ്ടെന്ന് താമസക്കാർക്ക് മുന്നറിയിപ്പ് നൽകിയതായി പ്രതിരോധ മന്ത്രാലയം തിങ്കളാഴ്ച അറിയിച്ചു. നവംബർ 12 ചൊവ്വാഴ്ച വൈകുന്നേരം ആരംഭിച്ച പരിശീലനം 2024 ഡിസംബർ 3 വരെ തുടരും.
അതേസമയം സൈനിക പരിശീലനം നടക്കുന്ന ഇടങ്ങളിൽനിന്ന് സുരക്ഷിതമായ അകലം ഉറപ്പാക്കാൻ പൊതുജനങ്ങളും താമസക്കാരും ശ്രദ്ധിക്കണമെന്നും മന്ത്രാലയം അഭ്യർത്ഥിച്ചു. ദേശീയദിനാഘോഷത്തെ പിന്തുണയ്ക്കുന്നതിനുള്ള സഹകരണത്തിനും പ്രതിബദ്ധതയ്ക്കും ആത്മാർത്ഥമായ നന്ദി അറിയിക്കുന്നു എന്നാണ് മന്ത്രാലയം അറിയിച്ചത്.
സോഷ്യൽ മീഡിയ പ്ളാറ്റ് ഫോമായ എക്‌സിലൂടെയായിരുന്നു മന്ത്രാലയത്തിൻ്റെ മുന്നറിയിപ്പ്. യുഎഇ ദേശീയദിനാഘോഷത്തിനായി വിപുലമായ തയ്യാറെടുപ്പാണ് രാജ്യത്ത് ഉടനീളം നടക്കുന്നത്. ഈ വർഷം മുതൽ ‘ഈദ് അൽ ഇത്തിഹാദ്’ എന്ന പുതിയ പേരിലാണ് ദേശീയ ദിനം ആഘോഷിക്കപ്പെടുക. ഡിസംബർ 2നാണ് ആഘോഷം.
