ഗോൾഡൻ വിസ നേടാൻ ആഗ്രഹിക്കുന്നവർക്ക് ഒരു സന്തോഷ വാർത്ത. ഗോൾഡൻ വിസയ്ക്ക് യോഗ്യത നേടുന്നതിന് ആവശ്യമായ പ്രോപ്പർട്ടി വാങ്ങുന്നവർ ഇനി മുതൽ 1 മില്യൺ ദിർഹം ഡൗൺ പേയ്‌മെന്റായി നൽകേണ്ടതില്ല. വസ്തുവിന്റെ മൂല്യം 2 ദശലക്ഷം ദിർഹത്തിൽ കൂടുതലാണെങ്കിൽ ഒരു പേയ്‌മെന്റ് പ്ലാനോ മോർട്ട്ഗേജോ തിരഞ്ഞെടുക്കുന്ന ഉടമകൾക്ക് ദീർഘകാല വിസയ്ക്ക് അപേക്ഷിക്കാവുന്നതാണ്.
മുൻകൂറായി അടച്ച തുക പരിഗണിക്കാതെ ഉടമയ്ക്ക് 10 വർഷത്തെ റെസിഡൻസി വിസയ്ക്കും അപേക്ഷിക്കാം. ഓഫ്-പ്ലാൻ പ്രോപ്പർട്ടികൾ കേസ്-ടു-കേസ് അടിസ്ഥാനത്തിൽ പരിഗണിക്കാവുന്നതാണ്. അപേക്ഷകർ വസ്തുവിന്റെ ഉടമസ്ഥാവകാശ രേഖ, ഡെവലപ്പറുടെ കത്ത് അല്ലെങ്കിൽ ബാങ്കിൽ നിന്നുള്ള മോർട്ട്ഗേജ് രേഖ, അവരുടെ പാസ്‌പോർട്ട് പകർപ്പ് , ഫോട്ടോ എന്നിവ അപേക്ഷയോടൊപ്പം സമർപ്പിക്കുകയും വേണം. ദുബായ് ആസ്ഥാനമായുള്ള പ്രോഫൗണ്ട് ബിസിനസ് സർവീസ് മാനേജിംഗ് ഡയറക്ടർ ഫിറോസെഖൻ ആണ് ഇക്കാര്യം അറിയിച്ചത്.
Allsopp & Allsopp ഗ്രൂപ്പിന്റെ സെയിൽസ് പ്രോഗ്രഷൻ മേധാവി ജെസ് സ്റ്റീഫൻസണാണ് 1 മില്യൺ ദിർഹത്തിന്റെ മിനിമം പേയ്‌മെന്റ് ആവശ്യമില്ലെന്ന് സ്ഥിരീകരിച്ചത്. മാത്രമല്ല, എല്ലാ ഗോൾഡൻ വിസ ഹോൾഡർമാരെയും പോലെ ഉടമകൾക്ക് അവരുടെ ഇണകളെയും കുട്ടികളെയും മാതാപിതാക്കളെയും 10 വർഷത്തെ കാലയളവിൽ സ്പോൺസർ ചെയ്യാനും കഴിയും. നിക്ഷേപകർക്ക് ഗോൾഡൻ വിസ ലഭിക്കുന്നതിന് വസ്തുവിന് 2 ദശലക്ഷം ദിർഹമോ അതിൽ കൂടുതലോ മൂല്യം ഉണ്ടായിരിക്കണം എന്നത് മാത്രമാണ് ഇപ്പോഴത്തെ യോഗ്യതാ മാനദണ്ഡം. കൂടാതെ ഭൂരിപക്ഷം ആളുകളും മോർട്ട്ഗേജിനായി ചെയ്യുന്ന വസ്തുവിന്റെ മൂല്യത്തിന്റെ 20 ശതമാനം നിങ്ങൾ അടച്ചാൽ അവർ വിസയ്ക്ക് യോഗ്യരാകുമെന്നും അദ്ദേഹം കൂട്ടിച്ചേർത്തു.
