സാങ്കേതിക വിദ്യയുടെ കാര്യത്തിൽ മുൻപന്തിയിലാണ് യുഎഇ. ഒരാഴ്ചയ്ക്കിടെ യുഎഇ തടഞ്ഞത് 2 ലക്ഷം സൈബർ ആക്രമണങ്ങളാണ്. ദുബായിൽ നടക്കുന്ന ജിടെക്സ് ഗ്ലോബലിലെ സെഷനിൽ വെച്ചാണ് അധികൃതർ ഇക്കാര്യം വ്യക്തമാക്കിയത്.
സൈബർ ആക്രമണങ്ങൾ യഥാസമയം തടയുന്നതിൽ യുഎഇ വിജയിച്ചതിനാൽ കംപ്യൂട്ടർ ശൃംഖലകളെ ബാധിച്ചിട്ടില്ലെന്ന് യുഎഇ സൈബർ സെക്യൂരിറ്റി കൗൺസിൽ ചെയർമാൻ ഡോ. മുഹമ്മദ് ഹമദ് അൽ കുവൈത്തി പറഞ്ഞു.
സൈബർ കുറ്റകൃത്യങ്ങൾക്കും ആക്രമണങ്ങൾക്കും എതിരായ യുഎഇയുടെ ശ്രമങ്ങൾക്ക് ആഗോള തലത്തിൽ അംഗീകാരം ലഭിച്ചിട്ടുണ്ട്. സെപ്റ്റംബറിൽ പുറത്തിറക്കിയ ഗ്ലോബൽ സെക്യൂരിറ്റി ഇൻഡക്സ് 2024 അനുസരിച്ച് സൈബർ സുരക്ഷയിലെ മുൻനിര രാജ്യങ്ങളിൽ യുഎഇ ഇടംപിടിച്ചിരുന്നു.
പുതിയ സാങ്കേതിക വിദ്യകൾക്കൊപ്പം നയങ്ങളും ഉറപ്പാക്കുന്നതിന് യുഎഇയിൽ സൈബർ സുരക്ഷാ തന്ത്രം പരിഷ്‌കരിക്കും. സൈബർ ആക്രമണം നിയന്ത്രിക്കുക, പ്രതിരോധിക്കുക, ആക്രമണങ്ങളിൽ നിന്ന് സ്ഥാപനങ്ങളെയും വ്യക്‌തികളെയും രക്ഷിക്കുക തുടങ്ങി എല്ലാ മേഖലകളെയും സുരക്ഷിതമാക്കുന്നതിന്റെ ഭാഗമായാണ് പരിഷ്കാരം.
