അറബ് റീഡിംഗ് ചലഞ്ചിന്റെ ഏഴാമത് എഡിഷനിലെ വിജയികളെ ഒക്ടോബർ 31 ന് ദുബായ് ഓപ്പറയിൽ പ്രഖ്യാപിക്കും. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം അറബ് റീഡിംഗ് ചാമ്പ്യനെയും പുതുതായി അവതരിപ്പിച്ച “പീപ്പിൾ ഓഫ് ഡിറ്റർമിനേഷൻ” വിഭാഗത്തിലെ വിജയിയെയും ആദരിക്കും. മികച്ച സ്കൂൾ, മികച്ച സൂപ്പർവൈസർ, കമ്മ്യൂണിറ്റി ചാമ്പ്യൻ എന്നിവരെയും പ്രഖ്യാപിക്കും.
46 രാജ്യങ്ങളിൽ നിന്നുള്ള പ്രതിനിധികൾ ശനിയാഴ്ച ദുബായിൽ എത്തി. അറബ് റീഡിംഗ് ചാമ്പ്യനും കമ്മ്യൂണിറ്റി ചാമ്പ്യനുമായി മത്സരിക്കുന്ന സെമിഫൈനലിസ്റ്റുകളും എല്ലാ അറബ് രാജ്യങ്ങളിൽ നിന്നും തിരഞ്ഞെടുക്കപ്പെട്ട മികച്ച 10 വിദ്യാർത്ഥികളും അവരുടെ സൂപ്പർവൈസർമാരും രക്ഷിതാക്കളും ഉൾപ്പെടെ 500 പേരെ ദുബായ് ഇന്റർനാഷണൽ എയർപോർട്ടിൽ അറബ് റീഡിംഗ് ചലഞ്ചിന്റെ സംഘാടകർ സ്വാഗതം ചെയ്തു.
ചടങ്ങ് ആഘോഷിക്കുന്നതിനായി അറബ് റീഡിംഗ് ചലഞ്ച് ലോഗോ ഉൾക്കൊള്ളുന്ന പ്രത്യേക എൻട്രി സ്റ്റാമ്പ് നൽകിയാണ് പങ്കെടുക്കുന്നവരെ വിമാനത്താവളത്തിൽ സ്വീകരിച്ചത്.
