സമൂഹത്തിനായി ചെയ്യുന്ന മാനുഷിക സംഭാവനകളുടെ അടിസ്ഥാനത്തിൽ വ്യക്തികളെ അംഗീകരിക്കുന്ന ‘ഹോപ്പ് മേക്കേഴ്‌സ്’ മത്സരത്തിൻ്റെ അഞ്ചാമത് എഡിഷൻ പ്രഖ്യാപിച്ചു. ഹോപ്പ് മേക്കേഴ്‌സ് പുരസ്കാരത്തിന് ഒരു മില്യൺ ദിർഹം സമ്മാനമായി നൽകുമെന്ന് യുഎഇ വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമാണ് പ്രഖ്യാപിച്ചത്.
ലാഭേച്ഛയില്ലാത്ത സാമൂഹിക പ്രവർത്തനങ്ങളിലൂടെ മറ്റുള്ളവരിൽ പ്രതീക്ഷയുടെ കിരണം പകരുന്നവരെ ആദരിക്കാനാണ് പദ്ധതി ഒരുക്കിയിരിക്കുന്നത്. ഗൾഫ് മേഖലയിൽ മാറ്റമുണ്ടാക്കാൻ സ്വന്തം സമയവും പരിശ്രമവും വിനിയോഗിക്കുന്ന പ്രതീക്ഷാദാതാക്കളെയാണ് ആദരിക്കുക.
തങ്ങളിലോ മറ്റുള്ളവരിലോ നന്മ കാണുന്ന ആർക്കും http://arabhopemakers.com എന്ന വെബ്‌സൈറ്റ് വഴി തങ്ങളെയോ മറ്റുള്ളവരെയോ നാമനിർദ്ദേശം ചെയ്യാമെന്ന് ഷെയ്ഖ് മുഹമ്മദ് വ്യക്തമാക്കി.
പുരസ്കാരത്തിന് അപേക്ഷിക്കാനുള്ള യോഗ്യതകൾ ഇവയാണ്:
• പ്രായോഗിക പരിചയം: അപേക്ഷിക്കുന്ന വ്യക്തി മുമ്പ് ഏതെങ്കിലും മാനുഷിക സേവനത്തിലോ സാമൂഹിക സേവനത്തിലോ പ്രവർത്തിച്ചിരിക്കണം.
• കഴിവുകൾ: വ്യക്തിക്ക് ജീവിതത്തെക്കുറിച്ച് നല്ല വീക്ഷണം ഉണ്ടായിരിക്കണം.
• ഭാഷ: ഭാഷ പരിജ്ഞാനം, വായന, എഴുത്ത് എന്നിവയിൽ പ്രാവീണ്യം നേടിയിരിക്കണം.
