വീൽചെയറിൽ ഇരുന്ന ഒരു വൃദ്ധയെ അങ്ങേയറ്റം അർപ്പണബോധത്തോടെയും വിനയത്തോടെയും സഹായിച്ച സർക്കാർ ഉദ്യോഗസ്ഥന്റെ വീഡിയോ ദുബായ് കിരീടാവകാശി മുമ്പ് സോഷ്യൽ മീഡിയയിൽ പങ്കുവെച്ചത് ഓർക്കുന്നുണ്ടോ? വീഡിയോയിൽ കണ്ട ജമാൽ അബ്ദുൾ റഹ്മാനെ നേരിട്ടെത്തി അഭിനന്ദിച്ചിരിക്കുകയാണ് ദുബായ് കിരീട ആവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ്.
കമ്മ്യൂണിറ്റി ഡെവലപ്‌മെന്റ് അതോറിറ്റി (സിഡിഎ) ജീവനക്കാരനെ ജോലിസ്ഥലത്ത് എത്തി സന്ദർശിച്ച് അദ്ദേഹത്തിന്റെ സേവനത്തിന് നന്ദി പറഞ്ഞു. ജമാലിനൊപ്പം നിൽക്കുന്ന ഫോട്ടോയും ഷെയ്ഖ് തന്റെ ഇൻസ്റ്റാഗ്രാം അക്കൗണ്ടിൽ പോസ്റ്റ് ചെയ്തു. കഴിഞ്ഞമാസമാണ് ജമാൽ അബ്ദുൾ റഹ്മാന്റെ വീഡിയോ ഷെയ്ഖ് ഹംദാൻ സോഷ്യൽമീഡിയ വഴി പങ്കുവെച്ചത്.
മുതിർന്നവരെ ബഹുമാനിക്കാനും യുവാക്കളെ സഹായിക്കാനും ആളുകളോട് വിനയം കാണിക്കാനും ആളുകളെ പ്രേരിപ്പിക്കുന്ന രാജ്യത്തിന്റെ “സാമൂഹിക മൂല്യങ്ങളും സംസ്കാരവും” പ്രതിഫലിപ്പിക്കുന്ന ജമാലിന്റെ പ്രവർത്തനങ്ങളെ പ്രശംസിച്ചുകൊണ്ടാണ് അന്ന് കിരീടാവകാശി സോഷ്യൽ മീഡിയയിൽ വീഡിയോ പങ്കുവെച്ചത്.
