ഷാർജ അന്തർദേശീയ പുസ്തക മേളയിലെ മലയാളി സാന്നിധ്യമാകാൻ സാഹിത്യകാരന്മാരായ റഫീഖ് അഹമ്മദും പി.പി രാമചന്ദ്രനും. നവംബർ 16ന് വൈകിട്ട് 6.30 മുതൽ 8 മണി വരെ കോൺഫറൻസ് ഹാളിൽ നടക്കുന്ന പുസ്തക മേളയിലെ കാവ്യസന്ധ്യയിലാണ് ഇരുവരും പങ്കെടുക്കുക.
റഫീഖ് അഹമ്മദിന്റെ കവിതയ്ക്ക് കേരള സാഹിത്യ അക്കാദമി അവാർഡും ചലച്ചിത്ര ഗാനങ്ങൾക്ക് ആറ് തവണ സംസ്ഥാന ചലച്ചിത്ര പുരസ്‌കാരവും ലഭിച്ചിട്ടുണ്ട്. ‘ലളിതം’ എന്ന ഒറ്റക്കവിത കൊണ്ട് മലയാള കവിതാസ്വാദകരുടെ മനസിൽ സ്ഥാനം നേടിയ കവിയാണ് പി.പി രാമചന്ദ്രൻ. കേരള സാഹിത്യ അക്കാദമി അവാർഡ്, പി കുഞ്ഞിരാമൻ നായർ കവിത അവാർഡ്, ചെറുശ്ശേരി അവാർഡ് തുടങ്ങി നിരവധി പുരസ്‌കാരങ്ങൾ അദ്ദേഹം സ്വന്തമാക്കിയിട്ടുണ്ട്.
നവംബർ 15-ന് രാത്രി 8 മുതൽ 9.30 വരെ കോൺഫറൻസ് ഹാളിൽ നടക്കുന്ന പരിപാടിയിൽ പുസ്തകത്തിനപ്പുറമുള്ള കഥകൾ – റാം C / O ആനന്ദിയുടെ കഥാകാരൻ അഖിൽ പി ധർമജനുമൊത്ത് ഒരു സായാഹ്നം’ എന്ന പരിപാടിയിൽ അഖിൽ പി ധർമജൻ പങ്കെടുക്കും. അതോടൊപ്പം നവംബർ 10ന് അവതാരകയും നടിയും എഴുത്തുകാരിയുമായ അശ്വതി ശ്രീകാന്ത് ‘റേഡിയോ വീചികളിൽ നിന്ന് ലിഖിതാക്ഷരത്തിലേക്ക് – അശ്വതി ശ്രീകാന്തുമൊത്ത് ഒരു വൈകുന്നേരം’ എന്ന പരിപാടിയിൽ പങ്കെടുക്കും.
