ദുബായിലെ മാൾ ഓഫ് എമിറേറ്റ്‌സിൽ വൈദ്യുതി മുടങ്ങി. ദുബായ് മാൾ ഔദ്യോഗിക വൃത്തങ്ങൾ തന്നെയാണ് ഇക്കാര്യം പുറത്ത് വിട്ടത്. അൽ ബർഷയിലെ മാൾ ഓഫ് എമിറേറ്റ്‌സിൽ വ്യാപാര സമയത്തിന് ശേഷമാണ് വൈദ്യുതി മുടങ്ങിയത്. ആ സമയത്ത് VOX സിനിമാസ് പ്രവർത്തനക്ഷമമായിരുന്നു. എല്ലാ അതിഥികളെയും സുരക്ഷിതമായി അവിടെ നിന്ന് ഒഴിപ്പിക്കുകയും ചെയ്തുവെന്ന് അധികൃതർ കൂട്ടിച്ചേർത്തു. അതേസമയം സിനിമ കാണാൻ എത്തിയവർക്ക് അവരുടെ സൗകര്യത്തിനനുസരിച്ച് VOX സിനിമാസിലേക്കുള്ള കോംപ്ലിമെന്ററി ടിക്കറ്റ് നൽകി. വൈദ്യുതി ഉടൻ പുനഃസ്ഥാപിച്ചതായും അധികൃതർ നൽകിയ പ്രസ്താവനയിൽ പറയുന്നു.
ദുബായിൽ വൈദ്യുതി മുടക്കം വളരെ അപൂർവമാണ്. ഇതിന് മുൻപ് 2017 ഏപ്രിലിൽ ആണ് ദുബായ് മാളിൽ രണ്ട് മണിക്കൂറോളം വൈദ്യുതി മുടങ്ങിയത്. അടുത്ത ദിവസം തന്നെ തടസ്സങ്ങളില്ലാത്ത വൈദ്യുതി വിതരണം ഉറപ്പാക്കാൻ അധിക പവർ ജനറേറ്ററുകൾ സ്ഥാപിക്കാൻ റിയൽ എസ്റ്റേറ്റ് ഡെവലപ്പർമാരോടും കമ്പനികളോടും യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം ഉത്തരവിട്ടിരുന്നു.
