യുഎഇയിൽ പരിശീലന വിമാനം തകർന്നു വീണ് പൈലറ്റ് മരിച്ചു. ഫുജൈറ കടൽത്തീരത്ത് നിന്ന് ഇദ്ദേഹത്തിന്റെ മൃതദേഹം കണ്ടെത്തിയതായി യുഎഇ ജനറൽ അതോറിറ്റി ഓഫ് സിവിൽ ഏവിയേഷൻ അറിയിച്ചു. ട്രെയിനിങ് ഇൻസ്ട്രക്‌ടർ കൂടിയായ പൈലറ്റാണ് മരിച്ചത്‌. കൂടെയുണ്ടായിരുന്ന ട്രെയിനിങ് വിദ്യാർത്ഥിയെ കാണാതായി.
പൈലറ്റും ട്രെയിനിയും മാത്രമാണ് വിമാനത്തിലുണ്ടായിരുന്നതെന്നാണ് പ്രാഥമിക നിഗമനം. അപകടത്തിൽ കാണാതായ വിദ്യാർത്ഥിക്കായി തിരച്ചിൽ തുടരുകയാണെന്ന് വ്യോമയാന അതോറിറ്റി അറിയിച്ചു. കാണാതായ വിദ്യാർത്ഥി വിദേശ പൗരനാണെന്ന് സംശയിക്കുന്നതായും അധികൃതർ അറിയിച്ചു. വിമാനം എവിടെ നിന്നാണ് ടേക്ക് ഓഫ് ചെയ്‌തതെന്ന് വ്യക്തമല്ലെങ്കിലും പറന്നുയർന്ന് ഏതാണ്ട് മിനിറ്റിന് ശേഷം റഡാറുമായുള്ള ബന്ധം നഷ്ടപ്പെടുകയായിരുന്നു.
അപകടത്തിന്റെ കാരണം കണ്ടെത്താനുള്ള അന്വേഷണം പുരോഗമിക്കുകയാണെന്നും വ്യോമയാന അതോറിറ്റി അറിയിച്ചു. അപകടത്തിൽ കൊല്ലപ്പെട്ട പൈലറ്റിന്റെ കുടുംബത്തിന് അധികൃതർ ആദരാഞ്ജലികൾ അറിയിച്ചു.
