ഷാർജയിലെ കൂടുതൽ പള്ളികളിൽ ജുമുഅ ഖുതുബ മലയാളത്തിലാക്കും. അറബികളല്ലാത്തവർ കൂടുതൽ താമസിക്കുന്ന മേഖലകളിൽ വെള്ളിയാഴ്ചകളിലെ പ്രഭാഷണം മലയാളം ഉൾപ്പെടെ അഞ്ച് ഭാഷകളിലാക്കാനാണ് തീരുമാനം.
മലയാളത്തോടൊപ്പം തമിഴ്, ഇംഗ്ലീഷ്, ഉറുദു, പഷ്‌തൂ എന്നീ ഭാഷകളിലാണ് ജുമുഅ പ്രഭാഷണം നടത്തുക. എമിറേറ്റിലെ 93 മസ്‌ജിദുകളാണ് ഇതിനായി തിരഞ്ഞെടുത്തിരിക്കുന്നത്. വിശ്വാസികളിൽ മതപാഠങ്ങൾ, ജീവിതമൂല്യങ്ങൾ, പെരുമാറ്റം, ബോധവൽകരണം എന്നിവ കൂടുതൽ ഫലപ്രദമാക്കുന്നതിന്റെ ഭാഗമായാണ് തീരുമാനം.
ഷാർജ നഗരത്തിലെ 77 മസ്ജിദുകൾ, മധ്യമേഖലയിലെ 10 പള്ളികൾ, കിഴക്കൻ മേഖലയിലെ 9 പള്ളികൾ എന്നിവയാണ് ഇതിനായി ഷാർജ ഇസ്ലാമിക കാര്യവിഭാഗം തെരഞ്ഞെടുത്തത്. അതോടൊപ്പം ഭിന്നശേഷിക്കാർക്കായി ഷാർജയിലെ ഇമാം അഹമ്മദ് ബിൻ ഹംബൽ മസ്ജിദിൽ വെള്ളിയാഴ്‌ച പ്രഭാഷണത്തിന്റെ ആംഗ്യഭാഷ വിവർത്തനവും നടപ്പാക്കും.
