പ്രവാചകൻ മുഹമ്മദ് നബിയുടെ ജന്മദിനത്തോട് അനുബന്ധിച്ച് ശനിയാഴ്ച യുഎഇയില്‍ പൊതു അവധി. നേരത്തേതന്നെ സര്‍ക്കാര്‍ – സ്വകാര്യമേഖലകൾക്ക് അവധി പ്രഖ്യാപിച്ചിരുന്നു. അവധിയോട് അനുബന്ധിച്ച് പാര്‍ക്കിംഗിനും ഇളവുകൾ പ്രഖ്യാപിച്ചു.
അബുദാബി എമിറേറ്റ്സില്‍ ശനിയാഴ്ച മുതൽ തിങ്കളാഴ്ച രാവിലെ 7.59 വരെ പൊതു പാർക്കിങ് സൗജന്യമായിരിക്കും. ടോൾ ഈടാക്കുന്നതും ഒ‍ഴിവാക്കിയിട്ടുണ്ടെന്ന് ഗതാഗത വിഭാഗം അറിയിച്ചു. എന്നാല്‍ ഷാർജ എമിറേറ്റില്‍ ശനിയാഴ്ച മാത്രമാണ് സൗജന്യ പാർക്കിംഗ് അനുവിദിക്കുക. അതേസമയം 7 ദിവസത്തെ പണമടച്ചുള്ള നീല പാര്‍ക്കിംഗ്് സോണുകളില്‍ ഇളവില്ല. ദുബായില്‍ പൊതു അവധി ദിവസങ്ങ‍ളിലും ഞായറാ‍ഴ്ചകളിലും പാര്‍ക്കിംഗിന് പണം ഈടാക്കില്ലെന്ന് േനരത്തേതന്നെ വ്യക്തമാക്കിയിട്ടുണ്ട്.
സര്‍ക്കാര്‍ ഓഫീസുകൾക്ക് അവധിയാണെങ്കിലും ഓണ്‍ലൈന്‍സേവനങ്ങൾ ലഭ്യമാകുമെന്ന് ഗതാഗത വിഭാഗം അറിയിച്ചിട്ടുണ്ട്. മിക്ക ഇസ്ലാമിക രാജ്യങ്ങളിലും പ്രവാചകന്റെ ജന്മദിനം 1444 റബി ഉൽ അവ്വൽ 12നാണ് ആചരിക്കുന്നത്. ഈ വര്‍ഷം ഒക്ടോബര്‍ എട്ടിനാണ് നബി ദിനം വന്നെത്തുക.
