ദുബായില്‍ ഭക്ഷണം വിതരണം ചെയ്യാന്‍ ഡ്രൈവറില്ലാ റോബോട്ടുകൾ എത്തുന്നു. ടേക്ക് എവേ ഡെലിവറി റോബോട്ട് പദ്ധതിയാണ് പ്രഖ്യാപിച്ചത്. ദുബായ് ഗതാഗത വകുപ്പായ ആർടിഎ, ഭക്ഷണ വിതരണ ആപ്പായ തലാബത്ത്, ദുബായ് ഇന്റഗ്രേറ്റഡ് ഇക്കണോമിക് സോൺസ് അതോറിറ്റി (DIEZ) എന്നിവയുമായി സഹകരിച്ചാണ് പദ്ധതി.
ഫുഡ് ഡെലിവറി പൈലറ്റ് പദ്ധതി ദുബായ് സിലിക്കൺ ഒയാസിസിൽ പരീക്ഷിക്കും.മൂന്ന് കിലോമീറ്റര്‍ ചുറ്റളവിലാണ് റോബോട്ടുകളുടെ സേവനം ലഭ്യമാക്കുക.ഓര്‍ഡല്‍ നല്‍കി പതിനഞ്ച് മിനിറ്റിനകം ഭക്ഷണ വിതരണം ഉറപ്പാക്കും.ആര്‍ട്ടിഫിഷ്യല്‍ ഇന്‍റലിജന്‍സ് സാങ്കേതികവിദ്യ ഉപയോഗിച്ചാണ് ഡെലിവറി റോബോട്ടുകൾ പ്രവര്‍ത്തിക്കുക. തലാബത്തിന്റെ ആപ്പ് ഇന്റർഫേസ് ഉപയോഗിച്ച് ഉപഭോക്താക്കൾക്ക് റോബോട്ടിന്റെ യാത്ര ട്രാക്ക് ചെയ്യാനും മറ്റ് വിശദാംശങ്ങൾ പരിശോധിക്കാനും ക‍ഴിയും.
സ്മാർട് സിറ്റിയുടെ ദർശനങ്ങളെ പിന്തുണയ്ക്കുന്ന പദ്ധതികളുടെ ഭാഗമായാണ് നീക്കം.സേവനങ്ങളുടെ ഗുണനിലവാരവും പുതുമകളും ദുബായെ ഏറ്റവും മികച്ച നഗരമാക്കുമെന്നാണ് നിഗമനം.2023 സുസ്ഥിര വർഷത്തോട് അനുബന്ധിച്ച് പരിസ്ഥിതി സൗഹൃദ സാങ്കേതികവിദ്യകൾ പരീക്ഷിക്കുന്നതിനൊപ്പം ഭാവി മുന്നില്‍കണ്ടുളള പദ്ധതികളാണ് നടപ്പാക്കുന്നത്. കാര്‍ബണ്‍ ബഹിര്‍ഗമനം കുറച്ച് സീറോ-എമിഷൻ മോഡുകളുടെ ഉപയോഗം പ്രോത്സാഹിപ്പിക്കുന്നതും പദ്ധതിയുടെ ഭാഗമാണ്.
2030 ഓടെ ദുബായിലെ എല്ലാ ഗതാഗത യാത്രകളുടേയും 25 ശതമാനവും സ്‌മാർട്ടും ഡ്രൈവർ രഹിതവുമാക്കാനുള്ള നീക്കങ്ങളാണുളളത്. അടുത്ത തലമുറയിലെ റൈഡർമാരെ പിന്തുണയ്ക്കുന്ന സുസ്ഥിര പദ്ധതിയാണിതെന്നും ആര്‍ടിഎ അറിയിച്ചു.
