മിഡിലീസ്റ്റിലെ ഏറ്റവും സമയനിഷ്ഠയുള്ള വിമാന കമ്പനികളുടെ പട്ടികയിൽ അബൂദാബിയുടെ ഇത്തിഹാദ് എയർവേസ് ഒന്നാം സ്ഥാനത്ത്. ഇത്തിഹാദിന്റെ 84 ശതമാനം സർവീസുകളും ഇതുവരെ പതിനഞ്ച് മിനിറ്റ് പോലും താമസിച്ചിട്ടില്ലെന്നാണ് കണക്കുകൾ പറയുന്നത്.
ഏവിയേഷൻ അനലിറ്റിക്സ് ഗ്രൂപ്പിന്റെ പങ്ച്വാലിറ്റി ലീഗ് റേറ്റിങ്ങിലാണ് ഇത്തിഹാദ് എയർവേയ്സ് മിഡിലീസ്റ്റിൽ ഒന്നാമതെത്തിയത്. ഈ വർഷത്തെ ആദ്യ ആറ് മാസത്തിലെ സർവീസ് പരിഗണിച്ചാണ് പട്ടിക തയാറാക്കിയിരിക്കുന്നത്.
അതേസമയം മിഡിലീസ്റ്റിലെ അപൂർവം ചില വിമാനകമ്പനികൾക്ക് മാത്രമാണ് 80 ശതമാനം കൃത്യത കൈവരിക്കാനായത്. കൂടാതെ ഏറ്റവും കുറവ് വിമാന സർവീസ് റദ്ദാക്കിയ വിമാനകമ്പനി എന്നതും ഇത്തിഹാദിന്റെ പ്രത്യേകതയായും പട്ടിക വിലയിരുത്തുന്നു. ആറ് മാസത്തിനിടയിൽ കൈവരിച്ച ഈ നേട്ടം സേവനത്തിൽ സ്ഥിരത നിലനിർത്താൻ പ്രേരകമാണെന്ന് ഇത്തിഹാദ് സിഇഒ മുഹമ്മദ് അൽ ബലൂക്കി അറിയിച്ചു.
