ദുബായിലെ തീ പിടിത്തമുണ്ടായ വീട്ടിൽ നിന്ന് സ്ത്രീകളും കുട്ടികളുമടക്കമുള്ള 24 പേരുടെ ജീവൻ സാഹസികമായി രക്ഷിച്ച ദുബായ് സിവിൽ ഡിഫൻസ് ഡയറക്ടറേറ്റ് ജനറലിൽ പ്രവർത്തിക്കുന്ന ഫസ്റ്റ് കോർപറൽ ഗദീർ ഹമൂദ് അൽ കഅബിയ്ക്ക് ആദരം. ധീരമായ പ്രവർത്തനം നടത്തിയ ഈ ഉദ്യോഗസ്ഥനെ ദുബായ് പൊലീസ് അഭിനന്ദിക്കുകയും ആദരിക്കുകയും ചെയ്തു. വീടിന്‍റെ പൂമുഖം, രണ്ട് കാറുകൾ, ടെന്‍റ് എന്നിവയ്ക്കാണ് അഗ്നിബാധയുണ്ടായത്.
യാദൃച്ഛികമായാണ് കഅബി വീടിന് തീപ്പിടിച്ചത് കണ്ടത്. ഉയർന്ന താപനില കാരണം തീ അതിവേഗം പടർന്നു. വീട്ടിൽ നിന്ന് പുക ഉയരുന്നത് അദ്ദേഹം ശ്രദ്ധിച്ചുവെങ്കിലും താമസക്കാരിൽ നിന്ന് യാതൊരു അനക്കമോ പ്രതികരണമോ ഉണ്ടായിരുന്നില്ല. പ്രധാന ഗേറ്റ് അടച്ചിരിക്കുന്നതായും കഅബി കണ്ടെത്തി. അതുകൊണ്ട് തന്നെ ഓപ്പറേഷൻ റൂമിൽ റിപോർട്ട് ചെയ്യാൻ നിൽക്കാതെ തീയും പുകയും അവഗണിച്ച് അകത്തേക്ക് കുതിച്ചു. സ്ത്രീകളും കുട്ടികളും ഉൾപ്പെടെയുള്ള താമസക്കാരെ സുരക്ഷിതമായി ഒഴിപ്പിക്കാൻ അദ്ദേഹം ഉടൻ നടപടിയെടുക്കുകയും തീയിൽ നിന്നും പുകയിൽ നിന്നും അവരെ മാറ്റി നിർത്തുകയും ചെയ്തു.
അതേസമയം പരുക്കേറ്റ വ്യക്തികളിൽ ഒരാൾക്ക് സിവിൽ ഡിഫൻസ് ടീമുകൾ എത്തുന്നതുവരെ അദ്ദേഹം പ്രഥമ ശുശ്രൂഷയും നൽകിയിരുന്നു. എന്നാൽ ജനറൽ ഡയറക്ടറേറ്റ് ഓഫ് സിവിൽ ഡിഫൻസ് അംഗം എന്ന നിലയിലുള്ള ഈ പ്രവർത്തനം ജോലിയുടെ ഭാഗമാണെന്നാണ് കഅബി പറഞ്ഞത്. അംഗീകാരം നൽകിയതിന് ദുബായ് പൊലീസിനോട് അദ്ദേഹം നന്ദി അറിയിക്കുകയും ചെയ്തു. അടിയന്തര സാഹചര്യങ്ങളോട് പ്രതികരിക്കാൻ സദാ സജ്ജരായിരിക്കാൻ സിവിൽ ഡിഫൻസ് തങ്ങളുടെ ജീവനക്കാരോട് ആവശ്യപ്പെടാറുണ്ടെന്നും അദ്ദേഹം കൂട്ടിച്ചേർത്തു.
