കുടുംബവുമായി എത്തി സമയം ചെലവഴിക്കാവുന്ന രണ്ട് വിനോദ പാർക്കുകളുടെ നിർമ്മാണം കൂടി പൂർത്തിയാക്കിയതായി ദുബായ് മുനിസിപ്പാലിറ്റി.
അൽ വർഖ 1, 4 ജില്ലകളിലായി 8 ദശലക്ഷം ദിർഹം ചെലവിലാണ് പാർക്കുകൾ നിർമ്മിച്ചിരിക്കുന്നത്. എമിറേറ്റിലെ ജീവിതനിലവാരം ഉയർത്തുന്നതിനായി റെസിഡൻഷ്യൽ കമ്മ്യൂണിറ്റികളിൽ നിരവധി ഫാമിലി എന്റർടെയ്ൻമെന്റ് പാർക്കുകൾ നിർമ്മിക്കാനുള്ള പദ്ധതിയുടെ നാലാം ഘട്ടത്തിന്റെ ഭാഗമായാണിത്.
എമിറേറ്റിന്റെ ആകർഷണം കൂടുതൽ വർധിപ്പിക്കുന്നതിനും പൗരന്മാർക്കിടയിൽ ക്ഷേമവും സന്തോഷവും മെച്ചപ്പെടുത്തുന്നതിനും പൊതു പാർക്കുകളും വിനോദ ഇടങ്ങളും സൃഷ്ടിക്കുക എന്ന ലക്ഷ്യത്തോടെ സ്ഥാപിതമായ ദുബായ് മുനിസിപ്പാലിറ്റിയുടെ തന്ത്രപ്രധാനമായ സംരംഭങ്ങളിലൊന്നാണ് ഈ പദ്ധതി.
ദുബായ് മുനിസിപ്പാലിറ്റി ഡയറക്ടർ ജനറൽ ദാവൂദ് അൽ ഹജ്‌രിയുടെ വാക്കുകൾ ഇങ്ങനെ: “2019 നും 2021 നും ഇടയിൽ പൗരന്മാരുടെ പാർപ്പിട മേഖലകളിൽ 70 വിവിധ പദ്ധതികൾ നിർമ്മിച്ചു. വരും മാസങ്ങളിൽ 55 അധിക ഫാമിലി പാർക്കുകളും സ്ക്വയറുകളും ആരംഭിക്കാൻ ഞങ്ങൾ ഉദ്ദേശിക്കുന്നു. 93 ദശലക്ഷം ദിർഹം ചെലവാണ് കണക്കാക്കുന്നത്. നിലവിൽ ഞങ്ങളുടെ ലക്ഷ്യം നാല് പാർക്കുകൾ സ്ഥാപിക്കുക എന്നതാണ്, അതിൽ രണ്ടെണ്ണം അൽ വർഖ 1, 4 ജില്ലകളിലായി പൂർത്തിയാക്കി. ശേഷിക്കുന്ന രണ്ടെണ്ണത്തിന്റെ നിർമ്മാണം അൽ നഹ്ദ 1, ഹോർ അൽ അൻസ് ഈസ്റ്റ് എന്നിവിടങ്ങളിൽ പുരോഗമിക്കുകയാണ്, അവ വരും മാസങ്ങളിൽ അവയുടെ നിർമ്മാണം പൂർത്തിയാകുമെന്നും അൽ ഹജ്രി കൂട്ടിച്ചേർത്തു.
