യുഎഇയിലെത്തുന്ന പ്രവാസികൾക്ക് മികച്ച തൊഴിൽ അവസരം ഒരുങ്ങുന്നു. ലൈഫ് സയൻസ് മേഖലയിൽ പുതിയതായി 20,000 തൊഴിലവസരങ്ങൾ സൃഷ്ടിക്കാനാണ് നീക്കം. പത്ത് വർഷത്തിനകം ലക്ഷ്യം പൂർത്തിയാക്കുമെന്ന്അബുദാബി എക്സിക്യൂട്ടീവ് കൗൺസിൽ അംഗവും ആരോഗ്യവകുപ്പ് ചെയർമാനുമായ മൻസൂർ അൽ മൻസൂരി പറഞ്ഞു.
അബുദാബിയുടെ ജിഡിപിയിലേക്ക് 10,000 കോടിയിലേറെ ദിർഹമാണ് ഇതുവഴി പ്രതീക്ഷിക്കുന്നത്. സൂക്ഷ്മാണുക്കൾ, സസ്യങ്ങൾ, മൃഗങ്ങൾ, മനുഷ്യർ എന്നിവ ഉൾക്കൊള്ളുന്ന ജീവജാലങ്ങളെയും ജീവിത പ്രക്രിയകളെയും കുറിച്ചുള്ള പഠനമാണ് ലൈഫ് സയൻസ്. ബയോളജി, അനാട്ടമി, ആസ്ട്രോബയോളജി, ബയോടെക്നോളജി എന്നീ 4 അടിസ്ഥാന ശാഖകളും ഒട്ടേറെ ഉപശാഖകളും ലൈഫ് സയൻസ് മേഖലയിലുണ്ട് .
ഈ വർഷം 25 ശതമാനം കൂടുതൽ സ്ഥാപനങ്ങൾ ക്ലിനിക്കൽ പഠനങ്ങളുമായി തലസ്ഥാനത്തെ ലൈഫ് സയൻസിനെ സജീവമാക്കിയതായും മൻസൂർ അൽ മൻസൂരി പറഞ്ഞു. ആരോഗ്യമുള്ള ജനത, മികച്ച സേവനം, അത്യാധുനിക സാങ്കേതികവിദ്യ എന്നീ മൂന്ന് തലങ്ങളെ അടിസ്ഥാനമാക്കിയാണ് ലൈഫ് സയൻസിൻ്റെ പ്രവർത്തനം.
