ബാത്ത് ടബ്ബില്‍ വീണ് പിഞ്ചു കുഞ്ഞ് മരിച്ച സംഭവത്തില്‍ അന്വേഷണം തുടരുന്നു. കഴിഞ്ഞ ആഗസ്ത് 9 നാണ് ഷാര്‍ജയിലാണ് സംഭവം ഉണ്ടായത്. രണ്ടര വയസ്സുളള ഈജിപ്ഷ്യൻ ആൺകുട്ടിയാണ് മരിച്ചത്. കുടുംബവീട്ടില്‍ വെച്ചായിരുന്നു അപകടം. രാത്രി 7 മണിയോടെ കുഞ്ഞിനെ രക്ഷിതാക്കൾ അൽ ഖാസിമി ഹോസ്പിറ്റലില്‍ എത്തിച്ചെങ്കിലും മരണമടഞ്ഞതായി ഡോക്ടര്‍മാര്‍ സ്ഥിരീകരിക്കുകയായിരുന്നു.
കുഞ്ഞിനെ കുളിപ്പിക്കാനായി തയ്യാറെടുക്കുമ്പോ‍ഴാണ് ദാരുണ സംഭവമുണ്ടായതെന്നാണ് ബന്ധുക്കളുടെ വിശദീകരണം. ബാത്ത് ടബ്ബിന് സമീപത്തുനിന്ന് അമ്മ അൽപനേരം മാറിനിന്നപ്പോൾ കുട്ടി ബാത്ത് ടബ്ബിലേക്ക് വീഴുകയായിരുന്നു. അപകടമുണ്ടായതിനെപ്പറ്റി ബുഹൈറ പോലീസ് വിശദമായ അന്വേഷണം നടത്തുണ്ട്. കൂടുതല്‍ നിയമനടപടികളുടെ ഭാഗമായി കേസ് പബ്ലിക് പ്രോസിക്യൂഷന് കൈമാറിയതായും പോലീസ് അറിയിച്ചു.
മാതാപിതാക്കളുടെ അശ്രദ്ധയാണ് അപകടമുണ്ടാക്കിയതെന്നാണ് പൊലീസ് നിരീക്ഷണം. എല്ലാ രക്ഷിതാക്കളും അവരുടെ കുട്ടികളുടെ കാര്യത്തിൽ കൂടുതൽ ജാഗ്രത പുലർത്തണമെന്നും വൈദ്യുതോപകരണങ്ങളിൽ നിന്നും വെള്ളത്തിൽ നിന്നും കുട്ടികളെ അകറ്റി നിർത്തണമെന്നും പൊലീസ് അറിയിച്ചിട്ടുണ്ട്.
