ലോകത്തെ ഏറ്റവും കരുത്തുള്ള പാസ്‌പോര്‍ട്ട് യുഎഇയുടേതെന്ന് റിപ്പോർട്ടുകൾ. ഫിനാന്‍ഷ്യല്‍ കണ്‍സള്‍ട്ടന്‍സിയായ ആര്‍ടണ്‍ ക്യാപിറ്റലിന്റെ ഏറ്റവും പുതിയ പാസ്‌പോര്‍ട്ട് സൂചികയാണ് യുഎഇയെ ഒന്നാം സ്ഥാനത്ത് എത്തിച്ചത്. വീസ ഇല്ലാതെ 180 വിദേശനഗരങ്ങളിലേക്ക് പറക്കാന്‍ യുഎഇ പാസ്‌പോര്‍ട്ട് ഉള്ളവര്‍ക്ക് കഴിയുമെന്നതാണ് നേട്ടത്തിന് പിന്നിൽ.
ലോകത്തെ 90 ശതമാനം രാജ്യങ്ങളിലേക്കും മുന്‍കൂട്ടി വീസ എടുക്കാതെ തന്നെ യാത്ര ചെയ്യാൻ യുഎഇ പാസ്പോർട്ട് സ്വന്തമായുളളവർക്ക് കഴിയും. 127 രാജ്യങ്ങള്‍ യുഎഇ പൗരന്‍മാര്‍ക്ക് ഫ്രീ വീസ പ്രവേശനം അനുവദിച്ചിട്ടുണ്ട്. അമ്പതിലേറെ രാജ്യങ്ങളിലേക്ക് വീസ ഓണ്‍ അറൈവല്‍ സൗകര്യവും അനുവദിച്ചിട്ടുണ്ട്. 18 രാജ്യങ്ങളിലേക്ക് മാത്രമാണ് മുന്‍കൂര്‍ വീസ ആവശ്യമായി വരുന്നത്. അടുത്തിടെ യുഎഇ പാസ്‌പോര്‍ട്ടിൻ്റെ കാലാവധി പത്ത് വര്‍ഷമായി വർദ്ധിപ്പിച്ചിരുന്നു.
ആര്‍ടണ്‍ കാപിറ്റലിൻ്റെ പാസ്‌പോര്‍ട്ട് സൂചിക പ്രകാരം ലോകത്തെ രണ്ടാമത്തെ ശക്തമായ പാസ്‌പോര്‍ട്ട് സ്‌പെയിനിന്റേതാണ്. 179 രാജ്യങ്ങളിലേക്കാണ് സ്പാനിഷ് പൗരന്‍മാര്‍ക്ക് മുന്‍കൂട്ടി വീസ ആവശ്യമില്ലാതെ യാത്ര ചെയ്യാന്‍ അവസരമുളളത്. മൂന്നാം സ്ഥാനത്ത് ഫ്രാന്‍സ്, ജര്‍മനി, ഇറ്റലി എന്നിങ്ങിനെ 14 രാജ്യങ്ങൾ പട്ടികയിലുണ്ട്.
സ്വീഡന്‍, പോളണ്ട്, ഹംഗറി എന്നീ രാജ്യങ്ങള്‍ നാലാം സ്ഥാനത്തും ചെക്ക് റിപബ്ലിക്, ദക്ഷിണ കൊറിയ എന്നീ രാജ്യങ്ങൾ അഞ്ചാം സ്ഥാനത്തുമുണ്ട്. 70 രാജ്യങ്ങൾ മാത്രം സഞ്ചരിക്കാൻ കഴിയുന്ന ഇന്ത്യ പട്ടികയിൽ 71ആം സ്ഥാനത്താണ്.
