എമിറേറ്റിലെ വിവിധ വിനോദ സഞ്ചാര കേന്ദ്രങ്ങളിൽ ഇനി ഇളവുകളോടെ പ്രവേശിക്കാം. ഇതിനായി പുതിയ അബുദാബി പാസ്സ് പുറത്തിറക്കി. അബൂദാബിയിലെ പ്രധാന ആകര്‍ഷണ കേന്ദ്രങ്ങളിൽ 40 ശതമാനത്തോളം വരെ ഇളവോടു കൂടി സന്ദര്‍ശിക്കാന്‍ താമസക്കാര്‍ക്കും വിനോദസഞ്ചാരികള്‍ക്കും ഇതുവഴി അവസരം ലഭിക്കും. വിവിധ കേന്ദ്രങ്ങളിലെ പ്രവേശനം, സിം കാര്‍ഡുകള്‍, ഗതഗാതം, മറ്റ് യാത്രാസംബന്ധമായ സേവനങ്ങള്‍, മുതലായവയ്ക്കും ഇളവ് ലഭിക്കും. ‘എക്പീരിയന്‍സ് അബൂദാബി’ ആഗോള സഞ്ചാര സംവിധാനമായ ‘എലൈക്കു’മായി സഹകരിച്ചാണ് പാസ് സൗകര്യം സജ്ജമാക്കിയിരിക്കുന്നത്.
സ്മാര്‍ട്ട് പാക്കേജ്, ക്ലാസിക് പാക്കേജ്, എക്‌സ്‌പ്ലോറര്‍ പാക്കേജ് എന്നിങ്ങനെ മൂന്ന് തരം പാസുകളാണ് നിലവിൽ അനുവദിക്കുന്നത്. ലൂവർ അബൂദാബി, ഖസര്‍ അൽ ഹുസ്ന്‍, ഡെസേര്‍ട്ട് സഫാരി, സര്‍ക്യൂട്ട് എക്‌സിലെ ബി.എം.എക്‌സ് പാര്‍ക് തുടങ്ങി അബൂദാബിയെ കണ്ടറിയാനുള്ള അവസരമാണ് പാസിലൂടെ ഓരോ സഞ്ചാരിയ്ക്കും ലഭിക്കുക.
സ്മാര്‍ട്ട് പാക്കേജ് പാസ്
114 ദിര്‍ഹം മുതലാണ് സ്മാര്‍ട്ട് പാക്കേജ് പാസിന്റെ നിരക്ക്. ഏഴ് കേന്ദ്രങ്ങളില്‍ രണ്ടുമുതല്‍ മൂന്നു ദിവസം വരെ സന്ദര്‍ശിക്കാന്‍ ഈ പാസ് ഉപയോഗിച്ച് അവസരമുണ്ടാകും. 30 ശതമാനം വരെ ഇളവ് ഈ പാസിലൂടെ സന്ദർശകർക്ക് ലഭിക്കും. മാത്രമല്ല, ഹോട്ടല്‍ ബുക്കിങ്ങിന് 5 ശതമാനം നിരക്കിളവും പാസില്‍ ലഭ്യമാണ്.
ക്ലാസിക് പാക്കേജ് പാസ്
371 ദിര്‍ഹം മുതലാണ് ക്ലാസിക് പാക്കേജ് നിരക്ക് തുടങ്ങുന്നത്. നാലു മുതല്‍ ആറു ദിവസം വരെ ക്ലാസിക് പാസ് ഉപയോഗിക്കാം. 16 കേന്ദ്രങ്ങളില്‍ 35 ശതമാനം ഇളവ് ലഭിക്കും. കൂടാതെ ഹോട്ടല്‍ ബുക്കിങ്ങുകള്‍ക്ക് 7 ശതമാനം നിരക്കിളവും ലഭിക്കും.
എക്‌സ്‌പോളര്‍ പാക്കേജ് പാസ്
488 ദിര്‍ഹം മുതലാണ് എക്‌സ്‌പോളര്‍ പാക്കേജ് പാസ് തുടങ്ങുന്നത്. ഏഴുമുതല്‍ 10 ദിവസം വരെ കാലയളവുണ്ട് ഈ പാസിന്. എക്‌സ്‌പോളര്‍ പാക്കേജ് പാസ് വഴി 19 കേന്ദ്രങ്ങളില്‍ 40 ശതമാനം വരെ പ്രവേശന നിരക്കിളവ് ലഭിക്കും. ഹോട്ടല്‍ ബുക്കിങ്ങിന് 10 ശതമാനത്തിന്റെ കുറവുണ്ടാകും.
