ചൊവ്വാഴ്ച അൽ ഐനിലുണ്ടായ അപകടത്തിൽ അഞ്ച് യുവ എമിറാത്തികൾ കൊല്ലപ്പെട്ടതായി അബുദാബി പോലീസ് അറിയിച്ചു. പോലീസ് പങ്കുവെച്ച ഒരു ഫോട്ടോയിൽ ഇടിച്ച രണ്ട് വാഹനങ്ങളുടെ അവശിഷ്ടങ്ങൾ കാണാം. അൽ ഐനിലെ സാ റോഡിലാണ് അപകടമുണ്ടായത്.
മരിച്ചവരിൽ മൂന്ന് പേർ അടുത്തിടെ ഹൈസ്‌കൂൾ ബിരുദം നേടിയവരും ഒരാൾ 12-ാം ക്ലാസ് വിദ്യാർത്ഥിയുമാണ്. പുലർച്ചെ ഒരു മണിയോടെയാണ് വാഹനങ്ങൾ അപകടത്തിൽ പെട്ടത്. മരണപ്പെട്ടവർക്ക് ഒമർ അൽ മുഖ്ബാലി മസ്ജിദിൽ മയ്യിത്ത് നമസ്‌കാരം നടത്തി. തുടർന്ന് ഉമ്മുഗഫയിൽ ഖബറടക്കുകയും ചെയ്തു. അപകടത്തിൽപ്പെട്ട ആറാമത്തെ ആൾ തീവ്ര പരിചരണ വിഭാഗത്തിൽ ചികിത്സയിലാണ്.
മരിച്ചവരുടെ കുടുംബങ്ങൾക്ക് പോലീസ് അനുശോചനം അറിയിച്ചു. കൂടാതെ ഔദ്യോഗിക സ്രോതസ്സുകളിൽ നിന്ന് മാത്രം വിവരങ്ങൾ നേടാനും കിംവദന്തികൾ പ്രചരിപ്പിക്കുന്നത് ഒഴിവാക്കാനും ഉദ്യോഗസ്ഥർ ജനങ്ങളോട് അഭ്യർത്ഥിച്ചു.
